Қарағандыда полицейлер синтетикалық есірткі сату фактісін анықтады, – деп хабарлайды Polisia.kz.
Мамыр айының алғашқы күндерінде Қарағанды қаласының есірткі қылмысына қарсы күрес бөлімінің қызметкерлері әлеуметтік желілерге мониторинг жүргізе отырып, хат алмасушының бірі мекенжайдың геолокациясын көрсеткенін анықтады. Мекенжайды тексеру барысында көрсетілген жерде синтетикалық препарат анықталып, тәркіленді.
5 мамырда жедел-іздестіру шаралары барысында облыс орталығының екі тұрғыны анықталып, ұсталды. Күдіктілердің тұрғылықты жерін тінту кезінде осы телефон нөмірлеріне аккаунты бар әлеуметтік желілер орнатылған ұялы телефондар тәркіленді.
Әлеуметтік желі парақшаларында белгілі мекенжайды көрсететін жойылмаған хат-хабарлар жазылған чаттар болды. Гаджеттерден басқа, қаражат түскен банк карталары табылды. Сондай-ақ, салмағы екі грамм болатын синтетикалық ерекше иісі бар зат, салмағы 5 грамм болатын өсімдік текті зат алынды.
Алынған заттай дәлелдемелердің барлығына сараптамалар тағайындалды. Қазақстан Республикасы Қылмыстық кодексінің 297-бабы 3-бөлігі, 5-тармағы (Есірткі, психотроптық заттарды, сол тектестерді өткізу мақсатында заңсыз дайындау, қайта өңдеу, иемдену, сақтау, тасымалдау, жөнелту не өткізу) бойынша күдіктілерге қатысты сотқа дейінгі тергеу амалдары басталды.
Ал Жезқазған қаласы тергеу бөлімінің қызметкерлері есірткі қылмысына қарсы күрес бөлімімен бірлесе отырып 36 жастағы облыс тұрғынына қатысты Қазақстан Республикасы ҚК-нің 296-бабы 1-бөлігі (Есірткі, психотроптық заттармен, сол тектестермен өткізу мақсатынсыз заңсыз жұмыс істеу) бойынша қылмыстық іс сотқа жолданды. Ер адам салмағы төрт грамнан асатын гашиш есірткі затын заңсыз сақтаған. Енді айыпталушының мәселесін сот шешеді.
