Қарағандыда шетелдік студенттердің құқықтық сауаттылығы артып келеді, - деп хабарлайды Polisia.kz.
Білім беру дәстүрі қалыптасқан Қарағанды облысында бүгінде 1300-ден астам шетелдік студент білім алуда. Олар Йемен, Иордания, Румыния, Қытай, Моңғолия, Иран, Пәкістан, Үндістан, Ресей, Украина, Өзбекстан және Қырғызстан сияқты алыс-жақын шет мемлекеттерден келген. Әр елдің өкілі болып табылатын бұл студенттер өңірдің мәдени өмірін байытып қана қоймай, жергілікті жоғары оқу орындарының академиялық әлеуетінің артуына да өзіндік үлес қосып келеді.
"Заң және тәртіп" тұжырымдамасын іске асыру аясында Қарағанды облыстық полиция департаментінің көші-қон қызметі шетелдік студенттермен жоғары оқу орындарында тұрақты түрде кездесулер өткізіп тұрады. Кездесулердің негізгі мақсаты – Қазақстан аумағында болу тәртібі жөнінде толық түсінік беру және көші-қон заңнамасының талаптарын сақтау мәдениетін қалыптастыру.
Іс-шара барысында полиция қызметкерлері тіркеу тәртібі, визаның жарамдылық мерзімі және көші-қон талаптарын бұзған жағдайда қолданылатын жауапкершілік туралы кең көлемде ақпарат береді. Сонымен қатар құқық бұзушылықтардың алдын алу мәселелері, шетелдік азаматтардың құқықтары мен міндеттері де егжей-тегжейлі түсіндіріледі.
Ресми бөлімнен кейін студенттер көкейлеріндегі сұрақтарын қойып, мамандардан кәсіби әрі нақты жауап алу мүмкіндігіне ие болады. Көп жағдайда полиция қызметкерлері құжаттарды рәсімдеу бойынша практикалық көмек көрсетіп, шетелдік студенттердің елімізге бейімделуін жеңілдетуге атсалысады.
Полиция мен халықаралық студенттер арасындағы мұндай өзара тиімді ынтымақтастық өңірдегі заңдылық пен қоғамдық тәртіпті нығайтуға, сондай-ақ Қарағанды облысында шетелдік азаматтардың жайлы білім алып, еркін өмір сүруіне қолайлы жағдай қалыптастыруға ықпал етеді.
