Қарағандылық тәртіп сақшылар полиция мектебінің оқушыларына экскурсия ұйымдастырды, – деп хабарлайды Polisia.kz.
Қарағандыда алғашқылардың бірі болып Қазақстан Республикасы Ішкі істер министрлігінің Б.Бейсенов атындағы академиясының базасында полиция мектебі құрылған болатын.
Кездесудің мақсаты – жасөспірімдерді салауатты өмір салтын ұстануға, заңға бағынуға және өз қатарластары арасында жағымды әсер етудің қайнар көзіне айналуға үйрету.
Оқушыларды Қарағанды қалалық полиция басқармасының бастығы Шахназар Салин күтіп алып, ғимаратты аралатып полиция жұмысымен таныстырды. Балаларға «102» пультіне хабарламалардың қалай қабылданатыны, инспектордың оқиға орнына полиция жасақтарын қалай жіберетіні түсіндіріліп, жедел басқару орталығының жалпы жұмысы көрсетілді.
Сондай-ақ полицияның жас курсанттарына Киберпол және көші-қон басқармасының жұмысы таныстырылды. Экскурсия соңында балаларға полиция қызметкерлерінің техникалық жабдықтарымен патрульдік автокөліктер көрсетілді.
