Атырауда полицейлер есірткі айналымының алдын алу шараларын күшейтті, - деп хабарлайды Polisia.kz.
Атырау облысында есірткі құралдары, психотроптық заттар мен олардың прекурсорларының заңсыз айналымына жол бермеу мақсатында "Қарасора-2025" жедел профилактикалық іс-шарасы өткізілуде.
Шара аясында Атырау облысы полиция департаментінің есірткі қылмысына қарсы іс-қимыл басқармасы және кинологиялық қызмет орталығының қызметкерлері "Қазпошта" АҚ филиалында пошта жөнелтілімдерін арнайы үйретілген іздестіру иттері арқылы тексерді. Нәтижесінде 70-ке жуық тінту-тексеру жүргізіліп, күдік тудыратын заттар анықталған жоқ.
Сонымен қатар Құрманғазы ауданына қарасты Бөкей-Хан елді мекеніндегі Құрманғазы шекара бекетінде де тексеру жұмыстары атқарылды. Мұнда полиция мен кинологтар 1000-нан астам тінту-тексеру жұмыстарын жүргізді.
Мақсат – облыс аумағына тыйым салынған есірткі және психотроптық заттардың заңсыз жеткізілуін болдырмау, сондай-ақ мұндай құқық бұзушылықтардың алдын алу.
Атырау облысында бұл бағыттағы жұмыстар жүйелі түрде жалғасады.
