Конституцияның 30 жылдығына орай Ішкі істер министрлігі мен "Азаматтарға арналған үкімет" Мемлекеттік корпорациясы алғаш рет жеке куәлік алған азаматтарға құжаттарды салтанатты түрде табыстады, - деп хабарлайды Polisia.kz.
Құжаттар 16 жасқа толған жасөспірімдерге, Қазақстан Республикасының азаматтығын алған тұлғаларға, сондай-ақ алғаш рет жеке куәлікті онлайн-форматта рәсімдеген азаматтарға табысталды.
– Әрбір азамат үшін жеке куәлік алу – қоғам мен мемлекет алдындағы жауапкершілікті сезінуге жасалатын маңызды қадам. Бұл ретте жасөспірімдердің өз құқықтары мен міндеттерінің маңыздылығын түсіне бастауы қуантады, – деп атап өтті ІІМ көші-қон қызметі комитеті төрағасының орынбасары Жанар Қожахметова.
Іс-шараға Конституциялық Соттың судьясы Айгүл Қыдырбаева қатысты.
Іс-шара еліміздің негізгі заңында көрініс тапқан құндылықтарды айшықтап, адам өмірі, құқықтары мен бостандықтарын басты приоритет ретінде айқындайтынын көрсетті.
– Жеке куәлік азаматтың құқықтық мәртебесін растап қана қоймай, заңмен бекітілген құқықтары мен міндеттерін толыққанды жүзеге асыруына мүмкіндік береді. Конституция күні қарсаңында мұндай салтанатты рәсімнің өткізілуі жай емес. Себебі дәл осы Конституция мемлекеттік негіздерді айқындап, азаматтардың құқықтары мен бостандықтарына кепілдік береді, – деді "Азаматтарға арналған үкімет" Мемлекеттік корпорациясы басқарма төрағасының орынбасары Айбат Ілиясов.
Қатысушыларға естелік сыйлықтар мен Конституцияның 30 жылдығына орай шығарылған мерейтойлық монеталар табысталды.
ІІМ мәліметінше, 2025 жылдың басынан бері 16 жасқа толған жасөспірімдерге 220 363 жеке куәлік, ал Қазақстан азаматтығын қабылдағандарға 11 781 жеке куәлік рәсімделген.
