Қазақстан мен Өзбекстанның ІІМ қылмыстың алдын алу және оған қарсы күрес саласындағы өзара іс-қимылды нығайтуда,- деп хабарлайды Polisia.kz.
Қазақстанның ішкі істер министрі Ерлан Тұрғымбаев Өзбекстанның Ішкі істер министрінің орынбасары Нажмиддин Тұраходжаевпен кездесті.
Тараптар екі жақты ынтымақтастықты талқылап, қылмысқа, заңсыз көші-қонға, құқық бұзушылықтың алдын алуға, сондай-ақ цифрландыру мен қазіргі заманғы қауіпсіздік жүйелерін енгізуге қатысты кең ауқымды мәселелер бойынша пікір алмасты.
Кездесуге қатысушылар ішкі істер органдарының шекара маңы бөлімшелерінің өзара іс-қимылын одан әрі нығайтуға ниет білдірді.
Айта кету керек, көптеген жылдар бойы екі елдің полицейлері бір-біріне қылмыстық істер бойынша практикалық көмек көрсетіп келеді, бірлескен іздестіру жұмыстары жолға қойылған.
Ерлан Тұрғымбаев Қазақстан ІІМ реформалау үдерісінде екенін атап өтті. Ішкі істер органдарын жаңғырту жөніндегі жол картасы іске асырылуда. Оның шеңберінде біздің қызметіміздің инфрақұрылымын цифрландыру және қазіргі заманғы қауіпсіздік жүйелерін енгізу бойынша ауқымды жұмыс жүргізілуде.
–Өзбекстанда да, Қазақстанда да қылмысқа қарсы күресте ақпараттық-коммуникациялық жүйелер мен озық цифрлық технологияларды пайдалануға көп көңіл бөлінеді. Біздің елдеріміз арасында ортақ нәрсе көп болғандықтан, біз қазақстандық полицияны реформалау тәжірибесіне қызығушылық танытамыз, – деді министрдің орынбасары Нажмиддин Тұраходжаев.
–Біздің президенттеріміздің күш-жігерінің арқасында екі ел арасындағы ынтымақтастық сенім мен өзара көмекке негізделген. Әріптестіктің белгілі бір практикасы полиция ведомстволары – азаматтардың қауіпсіздігін қамтамасыз етуге жауапты органдар арасында да қалыптасқан. Мен бүгін біздің өзара іс-қимыл аясын кеңейтуге мүмкіндігіміз бар екеніне қуаныштымын. Полиция қызметін цифрландыру оқиғаларға және азаматтардың өтініштеріне жедел ден қоюға мүмкіндік берді. Сондықтан Қазақстанның ІІМ осы саладағы өзара тәжірибе алмасуды құптайды, – деп атап өтті кездесу барысында министр Ерлан Тұрғымбаев.
Кездесу қорытындысы бойынша екі елдің ведомстволары ынтымақтастықтың келешегін анықтады.
