Қазақстандық полицейлердің кәсіби қызметіне шетел азаматтары ризашылығын білдірді, - деп хабарлайды Polisia.kz.
Қарағанды облысы полиция департаментінің атына шетелдік азаматтардан шынайы алғысқа толы хат келіп түсті. Хатта көші-қон қызметі мамандарының кәсіби шеберлігіне, азаматтарға деген ізетті қарым-қатынасы мен адамгершілік қасиеттеріне жоғары баға берілген.
Жақын шет елден келген ана ұлымен бірге Қарағанды қаласындағы Оңтүстік-Шығыс полиция бөлімінің көші-қон қызметіне жүгінген. Қызмет көрсету барысында олар аға инспектор Гүзяль Тұрғамбаеваның кәсіби біліктілігіне, мейірімділігі мен ілтипатына ерекше тәнті болған. Келушінің айтуынша, инспектор барлық қажетті ақпаратты түсінікті әрі егжей-тегжейлі жеткізіп, құжаттарды рәсімдеу тәртібін тиянақты түсіндірген. Сондай-ақ зейнет жасындағы азаматшаға барынша ыңғайлы жағдай жасап, қабылдау уақытын тиімді ұйымдастырған.
Шетелдік азаматтар көші-қон қызметі бөлімшесінің бастығы Әмір Тоғайбаевқа да алғыстарын арнады. Ақпараттық жүйеде техникалық ақау туындаған сәтте бөлім қызметкерлері жедел әрі үйлесімді жұмыс істеп, қызмет көрсетудің сапасын төмендетпей, мәселені дер кезінде шешкен.
Өз хаттарында олар көрсетілген жанашырлық пен кәсібилікке шынайы ризашылықтарын білдіріп, мұндай қарым-қатынас Қарағанды облысы полиция департаментінде қалыптасқан жоғары қызмет мәдениетінің жарқын көрінісі екенін ерекше атап өтті.
