Нұр-Сұлтан қаласында Қазақстан Республикасының Ішкі істер министрі Ерлан Тұрғымбаевтың Қырғыз Республикасының Ішкі істер министрі Ұлан Ниязбековпен кездесуі өтті, - деп хабарлайды Polisia.kz.
Кездесу барысында екі министрлік ынтымақтастығының келешегі мен басым мәселелері талқыланды.
Ерлан Тұрғымбаев Қазақстан полициясын реформалау барысы, полиция жұмысының сервистік моделін енгізу, сондай-ақ, ішкі істер органдарын цифрландыруды дамыту туралы хабардар етті.
Ұлан Ниязбеков қазіргі заманғы қауіпсіздік жүйелерін енгізу мәселелерінде, сондай-ақ, құқық бұзушылықтың алдын алуды ұйымдастыру мен құқықтық тәртіпті қамтамасыз етудің жаңа тәсілдеріне ерекше қызығушылық танытты.
Жалпы кездесуге қатысушылар жедел-қызметтің барлық бағыттары бойынша екіжақты ынтымақтастықтың жоғары деңгейін атап өтті.
Кездесу дәстүрлі достық атмосферада, толық өзара түсіністік жағдайында өтті.
