Павлодарда 1846 азамат қоғамдық орындарда ішімдік ішкені немесе мас күйінде болғаны үшін жауапқа тартылды, - деп хабарлайды Polisia.kz.
Алкоголь тек денсаулыққа ғана емес, адамдар арасындағы қарым-қатынастарға да теріс әсер етіп, адамды заңсыз әрекеттерге итермелеуі мүмкін. Көшеде мас күйінде жүрген адамдарды байқап, азаматтардың полицияға хабарлауы дұрыс шешім, өйткені мұндай жағдайларда жазатайым оқиғалар болуы мүмкін.
Тәртіп сақшыларының айтуынша, құқық бұзушылықтар, қылмыстар мен жазатайым оқиғалардың көп бөлігі алкогольдің әсерінен жасалады.
Мысалы қала тұрғыны Желтоқсан көшесіндегі дүкеннің жанында ер адамның тұрғанын хабарлады. Торайғыров көшесіндегі әйел аулада жатқан ер адам туралы айтса, Ломов көшесінің бойындағы асхана жанында мас күйінде жатқан ер адам туралы да мәлімет түсті.
Тағы бір жағдайда Торайғыров көшесіндегі үйдің тұрғындары екі адамның орындықта алкоголь ішіп отырғанын полицияға хабарлаған.
Полиция қызметкерлері барлық көрсетілген мекенжайларға барған кезде, ер адамдардың мас күйінде болғанын анықтады. Барлығы уақытша бейімдеу және детоксикация орталығына жеткізілді. Олардың сергек болғаннан кейін құқық бұзушылық үшін әкімшілік жауапкершілікке тартылатыны белгілі болды.
Өңір тұрғындарына қоғамдық орындарда спирттік ішімдіктерді ішкені немесе мас күйінде болғаны үшін 5 АЕК мөлшерінде айыппұл салынатынын, ал бір жыл ішінде қайта бұзушылық жасаған жағдайда айыппұл көлемі 10 АЕК-ке дейін артатынын еске саламыз.
Полиция егер сіз құқық бұзушылықтың куәгері болсаңыз, 102 телефонына хабарласып, "police 102" мобильді қосымшасын пайдаланып немесе Instagram Direct @dp_pavlodar-ға ақпарат жолдауды сұрайды.
"Заң және тәртіп" қағидаты ішкі істер органдарының азаматтардың қауіпсіздігін қамтамасыз ету және қоғамдық тәртіпті сақтаудағы басты ұстанымы болып қала береді. Құқық бұзушылар өз әрекеттері үшін міндетті түрде жауапкершілікке тартылады.
