Абай облысындағы учаскелік полицейдің бір күні жайлы Polisia.kz сайты ақпарат ұсынады.
Оның еңбегі камера объективіне жиі іліне бермейді. Алайда аулалардағы тыныштық, отбасылардың қауіпсіздігі мен халықтың сенімі дәл осы қызметке тікелей байланысты. Учаскелік инспектор – көмекке бірінші болып келетін, өз аумағындағы тұрғындарды аты-жөнімен танитын және күн сайын қоғамдық тәртіптің күзетінде жүретін жан.
Полиция қызметкері Абылай Ақатаев – қызметін шын мәнінде ар-намыспен атқарып жүрген азаматтардың бірі. Оның күнделікті жұмысы – тәулік бойғы кезекшілік, тұрғындардың өтініштеріне жедел әрекет ету, құқықбұзушылықтың алдын алу және халықпен үздіксіз байланыс орнату.
Әрбір шақырту сабырлықты, мұқияттылықты және ең күрделі жағдайларда да дұрыс шешім таба білуді талап етеді. Учаскелік инспектордың еңбегі – ұран емес, нақты іс: қарт адамға көмектесу, тұрмыстық жанжалды реттеу, құқықбұзушылықтың алдын алу, қиын жағдайға тап болған жандарға қолдау көрсету.
Полиция қызметкерлері атап өткендей, қызметтің басты көрсеткіші – азаматтардың сенімі. Ал бұл сенім тек өз міндетін орындап қана қоймай, өз аумағының өміріне шын ниетімен араласатын қызметкер бар жерде қалыптасады.
Учаскелік инспекторлар қоғамдық қауіпсіздікті қамтамасыз етудегі негізгі тірек болып қала береді. Олар күн сайын өз еңбегімен қызметтің басты қағидатын дәлелдеп келеді – адамдарды қорғау және әр үйдегі тыныштықты сақтау.
