Қонаев қаласында интернет-алаяқтықтың алдын алу мақсатында кең ауқымды акция ұйымдастырылды, - деп хабарлайды Polisia.kz.
Соңғы уақытта онлайн қылмыстардың күрт өсуіне байланысты бұл шара халықтың қаржылық және құқықтық сауаттылығын арттыруға бағытталды.
Іс-шара аясында Ұлттық ұлан қызметкерлері адамдар көп жиналатын орындарда арнайы брошюралар таратып, азаматтарға алаяқтардың айла-тәсілдері туралы жан-жақты түсініктеме берді. Жалпы 1500-ден астам ақпараттық материал халыққа таратылды. Сондай-ақ құқық қорғау органдарының өкілдері мешіттерде, орталық базарларда, сауда және ойын-сауық орталықтарында, дүкендерде интернет-алаяқтықтың қауіптілігі жөнінде ескерту парақтарын орналастырып, түсіндіру жұмыстарын жүргізді.
Мамандардың айтуынша, алаяқтардың арбауына көбіне азаматтардың сенгіштігі мен қаржылық сауаттылығының төмендігі себеп болады. Сондықтан мұндай профилактикалық шаралар халықтың қырағылығын арттырып, алаяқтардың құрбаны болмауға көмектеседі.
Құқық қорғау органдары азаматтарға күмәнді сілтемелерге өтпеуге, жеке деректерді бөгде адамдарға бермеуге және қаржылық операцияларды тек ресми сайттар арқылы жүргізуге кеңес береді. Егер интернет-алаяқтардың құрбанына айналсаңыз, тез арада полицияға хабарласу қажет.
