Қонаевта қоғамдық тәртіпті бұзушыға әкімшілік қадағалау енгізілді, – деп хабарлайды Polisia.kz.
Қоғамдық тәртіпті бұзушылықтың алдын алу мақсатында Қонаев қаласының учаскелік полиция инспекторлары есепте тұрған азаматтармен жүйелі профилактикалық жұмыстар жүргізіп отырады. Бұл шаралар құқық бұзушылықтың қайталануын болдырмау және қоғамдық тыныштықты сақтау үшін маңызды рөл атқарады.
Тексеру нәтижесінде Ш. есімді азаматтың бірнеше рет қоғамдық тәртіпті бұзып, жергілікті тұрғындардың мазасын алғаны анықталды. Полиция қызметкерлері оның тәртібін зерттеп, қажетті дәлелдерді жинап, Қонаев қаласының әкімшілік құқық бұзушылықтар жөніндегі мамандандырылған ауданаралық сотына әкімшілік қадағалау енгізу туралы өтініш жолдады.
Сот материалдарды мұқият қарап шығып, Ш. есімді азаматқа алты ай мерзімге әкімшілік қадағалау орнату туралы шешім қабылдады. Қадағалау аясында оған белгілі бір шектеулер қойылып, оның тәртібін бақылау күшейтілді. Бұл шара азаматтың болашақта құқық бұзушылыққа жол бермеуі үшін қолданылған.
Мұндай қадамдар қоғамдағы заңдылық пен тәртіпті сақтауға, тұрғындардың қауіпсіздігін қамтамасыз етуге және олардың тыныштығын қорғауға бағытталған маңызды тетіктердің бірі болып табылады.
