Қостанай облысында полицейлер мопед пен скутер жүргізушілерінің жол ережесін бұзудың мыңдаған дерегінің жолын кесті, - деп хабарлайды Polisia.kz.
Жыл басынан бері облыс жолдарында мотокөлік қатысқан 25 жол-көлік оқиғасы тіркелді. Салдарынан бір адам қаза тауып, 27 адам жарақат алды. Бұл – алдын алуға болатын қайғылы жағдайлар.
Ауа райы жылыған сайын Қостанай облысының көшелерінде мопедтер, скутерлер мен электроскутерлер көбейіп кетті. Өкінішке қарай, осыған байланысты жол қозғалысы ережелерінің бұзылу фактілері де артты.
Полиция мәліметінше, 2025 жылдың басынан бері мотокөлік жүргізген 1000-нан астам адам жауапқа тартылған.
Олардың ішінде:
– 45 жүргізуші мас күйінде көлік басқарған;
– 300 адамда жүргізуші куәлігі болмаған;
– 324 адам тіркелмеген көлік басқарған;
– 56 адам міндетті сақтандыру рәсімдемеген.
Шамамен 200 мопед пен скутер айып тұрағына қойылды. Бұл көліктердің иелері жол ережелерін өрескел бұзып, өздеріне де, басқа жол қозғалысына қатысушыларына да қауіп төндірген.
- Бұл жай ғана статистика емес — бұл адамдардың тағдыры. Шлемсіз, тіркеусіз немесе мас күйінде жолға шығу бір сәтте қайғылы аяқталуы мүмкін. Барлық мотокөлік жүргізушілерін жол қозғалысы ережелерін сақтауға шақырамыз, — деп мәлімдеді полиция департаменті.
2025 жылдың 5 сәуірінен бастап Қазақстанда мопедтерді, электроскутерлерді және басқа мотокөліктерді міндетті түрде тіркеу енгізілді.
Тіркеуге жататын көліктер:
Қозғалтқыш көлемі 50 текше сантиметрге дейін немесе соған сәйкес электрқозғалтқышы бар және ең жоғары жылдамдығы 50 км/сағатқа дейінгі екі немесе үш дөңгелекті көлік құралдары (мопедтер, скутерлер және т.б.).
Қайда тіркеу керек:
Тұрғылықты жеріңіздегі мамандандырылған ХҚКО-ларда.
Қажетті құжаттар:
– Жеке куәлік (электронды нұсқада болуы мүмкін),
– Техникалық сипаттамалар туралы мәліметтер,
– Мемлекеттік баж салығын төлеу түбіртегі.
Тіркелмеген көлік басқарғаны үшін айыппұл салынады, көлік айып тұрағына қойылады.
Тіркеу — бұл жай бюрократиялық шара емес. Бұл — қауіпсіздік, заңдылық, ақырында — сіздің өміріңізге тікелей байланысты мәселе.
Полиция барлық мотокөлік иелерін заң талаптарын орындауға және өз өмірі мен айналасындағылардың өмірін қатерге тікпеуге шақырады.
