Қостанай облысында полицейлер тұрғындардан заңсыз сақталған қаруды тәркіледі, – деп хабарлайды Polisia.kz.
Қостанай өңірінде полицейлер екі жергілікті тұрғыннан тіркелмеген қару мен оқ-дәрілерді тәркіледі. Екі дерек те құқық бұзушылықтардың алдын алу және қару иелерін тексеру мақсатында өтіп жатқан республикалық "Учаске" жедел-профилактикалық іс-шарасы аясында анықталды.
Ұйымдасқан қылмысқа қарсы күрес басқармасының қызметкерлері Рудный қаласының 36 жастағы тұрғыны атыс қаруын заңсыз сақтауы мүмкін екені туралы жедел ақпарат алды. Тінту кезінде оның үйінен тапанша, 9 мм калибрлі 85 оқ-дәрі, травматикалық қаруға арналған бірнеше оқ-дәрі және оптикалық көздеуіші бар пневматикалық мылтық табылды.
Сондай-ақ ҰҚҚКБ қызметкерлері Қостанай облысы полиция бөлімінің әріптестерімен бірлесіп, 55 жастағы тұрғынның үйінде санкцияланған тінту жүргізді. Тексеріс барысында тұрғынның үйінен калибрі кіші мылтық, 12 калибрлі бір ұңғылы және 16 калибрлі қос ұңғылы мылтық және әртүрлі калибрлі 20 оқ-дәрі табылды.
Полицейлер толықтай тексеріс жүргізіп, қарулардың еш жерде тіркелмегенін және іздеуде еместігін анықтады. Екі дерек бойынша қылмыстық іс қозғалды, баллистикалық сараптама тағайындалды.
Полиция азаматтарға тіркелмеген қаруды сақтау немесе алып жүру – бұл жай ғана құқық бұзушылық емес, қылмыстық жауапкершілікке әкелетін әрекет екенін ескертеді. Егер сіздің қолыңызда ескі немесе табылған қару болса, оны ерікті түрде полицияға тапсырып, жауапкершіліктен босатылуға болады.
