Қостанай облысында полиция балаларға жолда жүру ережелерін түсіндірді, - деп хабарлайды Polisia.kz.
Yotong мектеп автобусы Рыбное ауылынан жолға шығады. Ішінде – 20 бала. Олар 7 шақырымдық қашықтықта орналасқан Октябрь ауылындағы мектепке барады. Бәрі әдеттегідей болғанымен, бүгінгі күн балалар үшін сәл өзгеше басталды, оларды жолда полицейлер қарсы алды.
Қостанай облысы ПД әкімшілік полиция басқармасының қызметкерлері рейс алдында мектеп автобусын тексерді: техникалық жағдайы, қауіпсіздік белдіктерінің жарамдылығы, жүргізушінің жағдайы қаралды. Бірақ шара тексерумен шектелмеді.
Полицейлер балаларға жол қозғалысы ережелері бойынша шағын интерактивті сабақ өткізді. Жолдан дұрыс өтуді, бағдаршам түстерінің мағынасын немесе қоғамдық көлікте өзін қалай ұстау керегі туралы дұрыс айтқандар – сыйлық ретінде кішкентай ойыншық патрульдік көлікті алды.
– Мұндай формат балаларға ұнайды. Бұл – тек лекция емес, шынайы эмоция. Біз ережелерді сақтау маңызды екенін түсіндіреміз және әрбір бала өз қауіпсіздігі ең алдымен өз қолында екенін сезінуі үшін тырысамыз, – дейді әкімшілік полиция басқармасының аға инспекторы Серік Қадірбаев.
Инспектордың айтуынша, жаңа оқу жылы қарсаңында балалардың жол-көлік оқиғаларынан жарақаттануының алдын алу – полицияның басты міндеттерінің бірі. Облыстағы 142 мектеп автобусының барлығы оқу жылы басталар алдында тексерілді.
– Біздің мақсатымыз тек автобустарды тексеру емес, балаларды осы процеске тарту. Олардың зейінді, жауапты болуына ықпал ету. Бұл тек жүргізушілер үшін ғана емес, балалардың өздері үшін де маңызды, – деп толықтырды Қадірбаев.
С.Кубеев атындағы мектептің тәрбие ісі жөніндегі орынбасары Марина Горковец те мұндай бірлескен жұмыстың тиімділігін атап өтті.
– Біз полиция қызметкерлеріне ризамыз. Олардың қатысуы балаларға қауіпсіз мінез-құлық мәдениетін қалыптастыруға көмектеседі. Сонымен қатар ата-аналардың алаңдаушылығын азайтады. Өйткені мектепке баратын жолдың бақылауда екенін білсең, өзіңді әлдеқайда тыныш сезінесің, – деді ол.
Мұндай рейдтер бір реттік шара емес. Оқу жылы бойы полиция профилактикалық іс-шаралар өткізіп, оқушылармен, ата-аналармен және жүргізушілермен кездесулер ұйымдастырады. Полицейлер әрбір оқушыға жеткізгісі келетін басты ой: жолдағы қауіпсіздік – күрделі ұғым емес, ол өмірді сақтап қалуы мүмкін күнделікті дағды.
