Қостанай облысында полиция екі автокөлік ұрлығын “ізін суытпай” ашты, — деп хабарлайды Polisia.kz.
“Құқықтық тәртіп” жедел алдын алу іс-шарасы аясында полицейлер екі автокөлік ұрлығын ізін суытпай ашты.
26 тамыз күні Рудный қаласында полицияға тұрғын үй ауласынан Honda Civic автокөлігінің ұрланғаны туралы хабарлама түсті.
Полиция жасағы дереу аталған көлікті іздеуге бағытталды. Бейнебақылау камераларының көмегімен тәртіп сақшылары күдіктінің жүрген жерін анықтады. Ол мас күйінде көлік басқарғаны үшін ұсталды.
Сот шешімімен оған 20 тәулікке әкімшілік қамау тағайындалды.
Сонымен қатар аталған факті бойынша қылмыстық іс қозғалып, тергеу жүргізілуде.
28 тамызға қараған түні патрульдік полиция қызметкерлері жоғары жылдамдықпен қозғалып келе жатқан автокөлікті байқайды.
Полицияның тоқтау жөніндегі заңды талабына бағынбаған жүргізуші жылдамдығын арттырып, қашпақ болды.
Қуу кезінде ол бағдаршамның қызыл түсіне өтіп кетіп, қауіпті маневрлер жасады, қызметтік автокөліктің жүруіне кедергі жасап, басқа жол қозғалысына қатысушылардың өміріне қауіп төндірді.
Жолдың бір бөлігінде жүргізуші рөлге ие бола алмай, көлігін бағанға соғып алды.
23 жастағы Астана қаласының тұрғыны мас күйінде болғанын мойындады. Оның айтуынша, достарымен моншада демалып, ішімдік ішкеннен кейін жақын жерде тұрған ашық көлікті айдап кеткен.
Сонымен қатар оның бұрын жүргізуші куәлігінен айырылғаны анықталды.
Оған қатысты екі қылмыстық іс қозғалды: көлікті айдап кету фактісі бойынша; жүргізуші куәлігінен айырылғанына қарамастан мас күйінде көлік басқарғаны үшін.
Қостанай облысы полиция департаментінің мәліметінше, жыл басынан бері өңірде 32 көлік ұрлығы ашылды.
Полиция жүргізушілерге қарапайым қауіпсіздік шараларын сақтауды ескертеді:
- көлікті ашық қалдырмаңыздар;
- мүмкіндігінше дабыл және қосымша құлып жүйелерін пайдаланыңыздар.
“Құқықтық тәртіп” жедел алдын алу іс-шарасы жалғасуда. Полиция азаматтарды қырағы болуға және күмәнді әрекеттерді байқаса, дереу “102” нөміріне хабарлауға шақырады.
