Қостанай облысында сотталғандарға онлайн сабақтар ұйымдастырылды, - деп хабарлайды Polisia.kz.
№ 38 мекеменің РММ жанындағы № 2 кешкі мектебі № 39 мекеменің РММ-дегі сотталғандар үшін онлайн сабақтар ұйымдастырды.
Аталған іс-шаралар сотталғандардың білім алу құқығын қамтамасыз етуге бағытталған. №39 мекемеде мектеп жоқ, сондықтан №2 кешкі мектептің педагогикалық құрамымен бірлескен жұмыс жазасын өтеп жатқан адамдар арасында оқуды жалғастыру және білім деңгейін арттыру үшін жағдай жасауға мүмкіндік берді.
Сабақтар заманауи технологияларды пайдалана отырып, онлайн форматта өтеді. Сотталғандар жалпы білім беретін пәндерді оқып-үйренуге, қорытынды аттестаттауға дайындалуға және одан әрі кәсіптік оқуын жалғастыруға мүмкіндік алады.
Мекемелер басшылығының айтуынша, мұндай бастамалар сотталғандардың білім деңгейін арттыруға ықпал етіп қана қоймай, қайта әлеуметтену процесінде маңызды рөл атқарады, олардың өзін-өзі дамытуға және босатылғаннан кейінгі өмірге дайындалуға мотивациясын қалыптастырады.
Онлайн сабақтарды ұйымдастыру бойынша жұмыс жалғасады. Келешекте пәндер тізбесін кеңейту және қосымша білім беру бағдарламаларын енгізу жоспарлануда.
