«Динамо» дене-шынықтыру спорт қоғамында өткен Қостанай облысы ПД жеке командалық чемпионатына 20 құрама командадан 78 полиция қызметкері қатысып, өз бақтарын сынады, – деп хабарлайды Polisia.kz.
Қостанай облысы полиция департаменті бастығының орынбасары Ардана Саймағамбетов қоян-қолтық ұрыстың полицияның жауынгерлік даярлығында ерекше маңызға ие екенін атап өтті. Жақсы физикалық дайындық – тәртіп сақшылары үшін басты басымдық. Іс-шараны аша отырып, ол қызметтік міндеттерді лайықты орындаудың маңыздылығына назар аударды.
– Бұл спорт түрінен жарысқа қатысушы қызметкерлердің саны артып келеді. Бүгінде біздің спортшылар облыстық, республикалық және халықаралық деңгейдегі түрлі жарыстарда өңір және ел намысын жоғары деңгейде қорғап жүр, – деді Ардана Саймағамбетов.
Жарыс жоғары деңгейде өтті. Барлық спортшылар жақсы дайындалған.
Жеке есепте жеңімпаз атанғандар:
– Итесов Вахид – Қамысты ауданының полиция бөлімінің қызметкері (57 келі);
– Сәтбек Есенгелдин – ЖҚАЖ жауынгері (62 келі);
– Диас Бакиев – ЖҚАЖ жауынгері (67 келі);
– Ермұхан Исниязов – ЖҚАЖ жауынгері (80 келі);
– Жалғас Жұмағалиев – ЖҚАЖ жауынгері (88 келі);
– Руслан Досыбаев – ОЖВ қызметкері (97 келі);
– Виктор Холодов-ОЖВ қызметкері (+97 келі);
– Мадияр Нұрғалиев – ПД қызметкері (+97 келі).
Ішкі істер органдары қызметкерлері арасында командалық есепте 1-орынды Қамысты полиция бөлімі иеленді, 2-орынды полиция департаменті, 3-орынды – Қостанай ауданының полиция бөлімі иеленді. Құқық қорғау құрылымдарының қызметкерлері арасында команда бойынша 1-орын ЖҚАЖ бөлімі, 2-орынды ПД ОЖВ, 3-орынды желілік полиция бөлімі қанжығаға байлады.
Жеңімпаздар мен жүлдегерлер медальдармен, грамоталармен, кубоктармен және бағалы сыйлықтармен марапатталды.
Сондай-ақ маусым айында Астана қаласында өткен жекпе-жектен әлем чемпионатының күміс жүлдегері Аманбек Жаманқараевқа ПД және «Динамо» ДШСҚ басшылығынан жоғары спорттық шеберлігі үшін бағалы сыйлық табысталды.
