Қостанай полицейі оқушыларға көпірден секірген адамды қалай құтқарғаны жайында айтып берді, – деп хабарлайды Polisia.kz.
Полиция департаментінде ерлік сабағын өткізу дәстүрге айналды. Қызмет бабында ерекше көзге түскен полицейлер осы сабаққа қатысады. 17 қаңтарда департамент мұражайында кезекті бір сабақ өтті. Адамның өмірін құтқару туралы патрульдік полиция қызметкері Батыржан Бейсенбин айтып берді.
2021 жылдың қараша айында ол әріптесі Мырзахан Сұлтановпен бірге көпірден өзенге секірген жас жігітті мұздай судан шығарып алды. Осындай ерлігі үшін полицейлер «Құқық тәртібін қамтамасыз етуге қосқан үлесі үшін» төсбелгісімен марапатталды.
№ 8 жалпы білім беретін мектептің оқушылары офицердің әңгімесін мұқият тыңдады. Полицей оларға қызмет және мамандық таңдау туралы кеңес айтты. Оқушылар өз кезегінде төтенше жағдай кезінде шешім қалай қабылданатыны туралы, неге полиция қызметін таңдағаны жөнінде сұрақтар қойды.
– Мұндай іс-шаралардың маңызы жоғары. Осы арқылы патриотизм, ар-намыс, парыз деген сөздердің мәні айқындалады. Осындай кездесулерге қатыса отырып, оқушылар полицейлердің қиын жұмысы туралы көбірек біледі, – деді Батыржан Бейсенбин.
Сабақ соңында балалар полицеймен естелікке суретке түсті. Содан кейін олар үшін департамент мұражайына экскурсия өткізілді.
