Қостанайда есірткіге қарсы акция аясында шаңғы чемпионаты өтті, - деп хабарлайды Polisia.kz.
22 қаңтар күні Қостанай қаласындағы №3 Балалар-жасөспірімдер спорт мектебінің шаңғы базасында қыздар мен ұлдар арасында шаңғы жарысынан чемпионат өтті. Бұл спорттық додада іріктеу кезеңінің жеңімпаздары Қостанай облысының атынан республикалық чемпионатқа қатысу мүмкіндігіне ие болды.
Аязды ауа райына қарамастан, қатысушылар өздерінің тамаша физикалық дайындықтарын, шеберліктерін және төзімділіктерін көрсетіп, жоғары нәтижелерге қол жеткізді.
Жарыс барысында Қостанай облысы полиция департаментінің есірткі қылмысына қарсы іс-қимыл басқармасының қызметкерлері жас спортшылармен кездесу өткізіп, есірткінің зияны мен салауатты өмір салтын ұстанудың маңыздылығы жөнінде әңгіме жүргізді. Сондай-ақ балаларға «Есірткіге жол жоқ» жазуы бар арнайы футболкалар сыйға тартылды.
Жарыс барысында жаттықтырушылар мен спортшылар есірткіге қатысты "жасырылған заттарды" қойып кету немесе іздеу оқиғаларының салдары мен заң алдындағы жауапкершілігін талқылады. Кейбір қатысушылар осындай жағдайлармен кездескен оқиғаларын айтып, жастар арасында бұл мәселеге ерекше көңіл бөлудің маңыздылығын атап өтті.
Бұл акция жас ұрпақ арасында салауатты өмір салтын насихаттау мен зиянды әдеттердің алдын алуға бағытталған маңызды шара ретінде жоғары бағаланды.
