"Гендерлік зорлық-зомбылыққа қарсы 16 күн белсенді іс-қимыл" акциясы аясында Қостанайда “Мәдениетті ана – мәдениетті ұлт” атты Аналар кеңесінің форумы өтті, – деп хабарлайды Polisia.kz.
Қостанайда облыстық және аудандық Аналар кеңесінің “Мәдениетті ана – мәдениетті ұлт” форумы өтті. Іс-шараға Аналар кеңесінің төрайымдары мен мүшелері, сондай-ақ құқық қорғау органдарының қызметкерлері қатысты.
Форумда отбасылық құндылықтарды нығайту, қоғамдағы құқық бұзушылықтың алдын алу, өскелең ұрпақты тәрбиелеу мәселелері кеңінен талқыланды. Ерекше назар инклюзивтілік тақырыбына және балалар мен жасөспірімдерді әлеуметтендіру әдістеріне аударылды.
Басты баяндамалардың бірі Жадыра Жұмаcұлтанова таныстырған "Салауатты сана" қоғамдық жобасының презентациясы болды. Ол бұл жобаның жастар мен олардың ата-аналары арасында дұрыс ойлау мен салауатты мінез-құлықты қалыптастыруға, сондай-ақ тұрмыстық және психологиялық зорлық-зомбылықтың алдын алуға бағытталғанын атап өтті.
Отбасылық-тұрмыстық зорлық-зомбылыққа қарсы іс-қимыл бөлімі бойынша ерекше тапсырмалар жөніндегі аға инспектор Гүлжанат Шаяхметова қатысушыларға 25 қараша мен 10 желтоқсан аралығында республика бойынша "Гендерлік зорлық-зомбылыққа қарсы 16 күндік белсенді іс-қимыл" акциясы өтіп жатқанын еске салды. Бұл бастаманың мақсаты — қоғамның назарын отбасындағы зорлық-зомбылық мәселесіне аудару және қиын жағдайға тап болған әр адам қолдау мен қорғау ала алатынын көрсету.
Шаяхметова өз сөзінде өзекті статистиканы да ұсынды. Оның айтуынша, биыл полицияға төрт мыңға жуық отбасылық жанжал туралы хабарлама түскен. Жүргізілген профилактикалық жұмыс нәтижесінде қайталама жүгінулер саны азайған.
Құқық қорғау қызметкерлері тәуекелдерді дер кезінде анықтау және құқықбұзушылықтың алдын алу үшін отбасылар арасында тұрақты түрде сауалнама жүргізіп, мониторинг жасап отырады. Қақтығыстардың негізгі себептері — алкогольге тәуелділік, қызғаныш, материалдық қиындықтар және түсініспеушіліктер.
Аймақта медициналық ұйымдармен бірлесіп агрессорларға арналған психокоррекциялық бағдарламалар жүзеге асырылуда. Биылдың өзінде соттар 140 адамды міндетті түзету көмегіне жіберген, бұл қайталама зорлық-зомбылық деңгейін төмендетуге ықпал етуде.
Облыста әйелдер және балалармен әңгімелесуге арналған арнайы бөлмелер, сондай-ақ дағдарыс орталықтары жұмыс істейді. Онда жәбірленушілер уақытша баспанамен, тамақпен және психологтар, заңгерлер, әлеуметтік қызметкерлердің көмегімен қамтамасыз етіледі.
Жыл басынан бері мұндай орталықтарға әйелдер, ер адамдар және балаларды қоса алғанда 80 адам орналастырылды.
Форум Қостанай облысы полиция департаменті мен Қазақстан халқы Ассамблеясы жанындағы Аналар кеңесі арасындағы ынтымақтастық туралы меморандумға қол қоюмен аяқталды.
Құжат тараптардың тұрмыстық зорлық-зомбылық пен есірткі қылмыстарының алдын алу, отбасылық құндылықтарды нығайту және халықтың өмір сүру сапасын арттыру бағытындағы бірлескен күш-жігерін бекітеді.
