Қостанайда полиция қауіпсіздік сабақтарын өткізді, - деп хабарлайды Polisia.kz.
М. Қозыбаев атындағы №23 орта мектепте және Қостанай құрылыс колледжінде Қостанай қалалық полиция басқармасының бастығы Болат Имановтың қатысуымен "Қауіпсіздік сабақтары" өткізілді.
Іс-шара өскелең ұрпақтың құқықтық мәдениетін қалыптастыруға, қоғам өміріндегі заңның рөлін түсіндіруге және құқықтық сананы арттыруға бағытталды.
Кездесулер барысында ерекше назар "Заң мен тәртіп" идеологиясына және Қазақстан Республикасының 2024–2028 жылдарға арналған қоғамдық қауіпсіздікті қамтамасыз ету тұжырымдамасына аударылды. Бұл тұжырымдама құқықтық тәртіпті қамтамасыз етудің жаңа тәсілін, яғни мемлекет пен қоғамның серіктестігі аясында, қауіпсіздік — баршаның ортақ жауапкершілігі екенін көздейді.
Оқушылар мен студенттерге тұжырымдаманың негізгі міндеттері туралы кеңінен түсіндірілді, олардың қатарында:
- құқыққа бағынушылық мәдениетін қалыптастыру — заңды қорқыныштан емес, сенім бойынша құрметтеу;
- буллингке, зорлық-зомбылыққа және заңсыз әрекеттерге тартуға жол бермейтін қауіпсіз білім беру ортасын құру;
- киберқауіптердің алдын алу, оның ішінде кибербуллингпен, алаяқтықпен және интернеттегі заңсыз әрекеттермен күресу;
- өмірлік қиын жағдайға тап болған жасөспірімдерді қолдау;
- полицияға деген сенімді ашықтық пен айқындық арқылы нығайту.
Атап өтілгендей, басты екпін алдын алу шараларына жасалды. Қауіпсіздік тек жасалған құқық бұзушылық үшін жазалаумен ғана емес, оларды ерте кезеңде болдырмаумен қамтамасыз етіледі.
"Қауіпсіздік сабақтары" барысында оқушылар мен студенттер құқықтық тәртіп, интернеттегі қауіпсіздік және жеке жауапкершілікке қатысты сұрақтарын қойды.
- Бүгін біз заңның өмірімізге қалай әсер ететіні туралы көп жаңа мәлімет алдық. Әсіресе, интернеттегі алаяқтардан қалай қорғануға болатынын тыңдау қызықты болды, - дейді 9-сынып оқушысы Нияз Шонов.
Өз сөзінде Болат Иманов қазіргі "Заң мен тәртіп" идеологиясы азаматтың заңды сақтауы — жазадан қорыққаннан емес, саналы таңдаудан туындайтынын атап өтті.
- “Заң мен тәртіп” идеологиясы мен қоғамдық қауіпсіздік тұжырымдамасы — бұл бақылау туралы емес, сенім мен жауапкершілік туралы. Бейбіт және қауіпсіз қоғам әрқайсымыздан басталады, — деп атап өтті Болат Иманов.
Мұндай кездесулер жастарға заң талаптарын жақсырақ түсінуге ғана емес, сондай-ақ қауіпсіз қоғам құрудағы өз рөлін сезінуге мүмкіндік береді. Ұйымдастырушылардың айтуынша, қауіпсіздік сабақтары алдағы уақытта облыстың мектептері мен колледждерінде ғана емес, университеттерінде де тұрақты түрде өткізіліп тұрады.
