Қостанайда тұрғындар мен полицияның серіктестігі күшейіп келеді, - деп хабарлайды Polisia.kz.
Қостанай облысында полиция қызметкерлерінің тұрғындармен, меншік иелері бірлестіктері мен пәтер иелері кооперативтері төрағаларымен тұрақты кездесулері жалғасып келеді.
Бұл форматтағы ашық қарым-қатынас қоғамдық қауіпсіздікті қамтамасыз етудің және құқық қорғау органдары мен халық арасындағы өзара сенімді нығайтудың маңызды бөлігіне айналды.
Бүгінде өңірде шамамен 120 меншік иелері бірлестігі мен 45 пәтер иелері кооперативі жұмыс істейді. Олар көпқабатты үйлерді басқаруда ғана емес, мемлекеттік органдармен тиімді ынтымақтастық орнатуда да үлкен рөл атқарады.
Жыл басынан бері полицейлер тұрғындармен 611 кездесу өткізген. Бұл қоғам тарапынан да, құқық қорғау органдары тарапынан да сындарлы диалогқа деген жоғары қызығушылықтың бар екенін көрсетеді.
Кездесулер барысында түрлі мәселелер талқыланады: аулаларды абаттандыру мен жарықтандыру, "шулы көршілерге" қатысты шағымдар, қоғамдық тәртіптің бұзылуы сынды күнделікті түйткілдер. Полиция өкілдері тек тұрғындарды тыңдап қана қоймай, нақты ұсыныстар беріп, түскен өтініштерді әрі қарай қарастыру үшін тіркейді.
Осындай ашық диалог жергілікті проблемаларды жедел шешуге мүмкіндік беріп қана қоймай, қауіпсіз әрі жайлы қалалық ортаны қалыптастыруға ықпал етеді. "Көршілер бақылауы" – жай ғана атау емес, қоғам мен полиция арасындағы тиімді әріптестіктің нақты құралына айналып отыр.
Құқық қорғау органдарының айтуынша, тұрғындармен мұндай кездесулер жүйелі түрде өтіп, облыстың барлық қалалық және ауылдық аумақтарын қамтымақ.
