Қараша айында Қазақстан Республикасы Ішкі істер министрлігінің Бауыржан Момышұлы атындағы оқу орталығында алғашқы кәсіптік даярлық тыңдаушыларымен кезекті топ аралық әскери-спорттық эстафета ұйымдастырылды, – деп хабарлайды Polisia.kz.
Бұл іс-шара оқу орталығына келген алғашқы кәсіптік даярлық курсы тыңдаушыларымен жүйелі түрде өткізіліп келе жатқан маңызды дәстүрге айналған. Оның мақсаты – жалпы жеке құрамды салауатты өмір салтын ұстануға шақыру, орталық қызметкерлері мен тыңдаушыларды дене тәрбиесі мен спортпен шұғылдануға ынталандыру, сондай-ақ тыңдаушылардың білім деңгейін тәжірибе жүзінде пысықтап, машықтандыру. Сонымен қатар бұл сайыс тыңдаушыларды экстремалды жағдайда қарумен жұмыс істеуге үйретуге бағытталған.
Сайысқа әр оқу тобының құрамынан іріктелген тыңдаушылар қатысып, топтың намысын қорғады. Спорттық эстафета бірнеше кезеңнен тұрады, онда тыңдаушылар кедергілерден өтіп, жылдамдықтарын шыңдай отырып, ептілік пен төзімділікті дамытуға, сондай-ақ қаруды толық емес бөлшектеу сияқты арнайы жаттығуларды орындауға тиіс болды.
– Оқу орталығында осындай іс-шаралар үнемі ұйымдастырылып тұрады. Бұл өз кезегінде топтың ұйымшылдығын арттырып, тыңдаушылардың теориялық білімдерін практикада нығайтуға мүмкіндік береді. Кейбір тыңдаушылар үшін бұл өздерінің күшті жақтарын көрсетуге жол ашып, оларға жаңа дағдыларды игеруге мүмкіндік береді, – деп атап өтті цикл оқытушысы Е. Рсымбетов.
