Қазақстан Республикасының Конституция күні – елдің басты мемлекеттік мерекесі. Осы атаулы күнмен тағдырлары тоғысқан, дәл осы күні дүниеге келген Павлодарлық жедел уәкілдер Жансап Исин мен Арман Оразбаев бүгінде қылмыстық полицияда абыройлы қызмет атқарып, құқықтық тәртіп пен қоғамдық қауіпсіздікті қамтамасыз етуге үлес қосып келеді, - деп хабарлайды Polisia.kz.
Павлодар қалалық полиция басқармасының Солтүстік полиция бөліміне қарасты қылмыстық полиция бөлімшесінде ерекше тағдыр иелері – Қазақстан Республикасы Конституциясы күні дүниеге келген қос азамат еңбек етуде. Олар – жедел уәкілдер Жансап Исин мен Арман Оразбаев.
Жоғары оқу орнын тәмамдағаннан кейін Конституцияның құрдастары ішкі істер органдарындағы қызметті таңдап, өз армандарын жүзеге асырды.
– Қызметте бастысы – дұрыс басымдық қоя білу және жұмыс уақытын сауатты жоспарлау. Біз қылмыстар мен құқық бұзушылықтарға қатысы бар күдіктілерді анықтау, олар туралы деректер жинау, қылмыстың алдын алу шараларын ұйымдастыру бағытында жұмыс істейміз. Алғашқы күндерден бастап бізге бағыт-бағдар беріп, тәжірибесімен бөлісіп жүрген тамаша тәлімгеріміз бар, – дейді Арман Оразбаев.
– Қазақстан үшін осындай атаулы жылы дүниеге келгеніміз – біз үшін үлкен мақтаныш. Өйткені дәл осы Конституция біздің мүдделерімізді қорғап, азаматтардың құқықтары мен міндеттерін айқындайды. Біз тәртіп сақшылары ретінде күнделікті еңбегімізбен құқықтық тәртіп пен қоғамдық қауіпсіздікті қамтамасыз етуге бар күш-жігерімізді арнаймыз, – деп толықтырды Жансап Исин.
