Сотталғандарды қоғамға бейімдеп, жаңа өмірге бағыттау – оңай міндет емес. Бұл – терең түсінік пен табандылықты, адами қасиет пен кәсіби шеберлікті талап ететін күрделі сала. Polisia.kz редакциясы осы жауапты қызметке өмірін арнағандардың бірі – Қызылорда облысы бойынша ҚАЖ департаментінің пробация қызметінде еңбек ететін әділет полковнигі Серік Сейталиев жайлы айтып береді.
Серік Сейталиев ішкі істер саласындағы еңбек жолын 2004 жылы тергеу изоляторында бастап, 2006 жылдан бері пробация қызметінде үздіксіз еңбек етіп келеді. Оның бұл қызметке тұрақтауына кәсібіне деген қызығушылығы мен адам тағдырына бейжай қарамайтын жанашыр мінезі себеп болды.
Сотталған азаматтармен тікелей жұмыс істеп, олардың мінез-құлқы, өмірлік жағдайы мен психологиялық күйін зерделеу – Серіктің күнделікті жұмысы. Ол тек бақылаушы емес, сонымен қатар кеңесші, тәлімгер, бағыт-бағдар беруші. Бір оқиғада, электронды білезік арқылы бақылаудағы азаматтың мекенжайда емес екенін анықтап, оқиға орнына өзі барып, тәртіп бұзушылықтың алдын алғаны оның қырағылығын дәлелдейді.
Жұмыстағы жауапкершілік пен әділдік, отбасындағы сабыр мен үлгі — Серіктің өмірлік ұстанымы. Бір баланың әкесі, әріптестері арасында беделді азамат. Қызметіндегі жетістіктері үшін ІІМ, ҚАЖ комитеті мен департамент басшылығы тарапынан бірнеше рет марапатталған.
Серік Сейталиев – пробация қызметінің шынайы жанашыры, адалдықтың символына айналған маман. Оның тәжірибесі мен адами қасиеттері жас қызметкерлер үшін үлгі бола алады.
Қызметке адалдық пен адамгершілік – әрбір тәртіп сақшысының басты қағидасы болуы тиіс.
