Қызылорда облысының полиция департаментінде есірткіге қарсы іс-қимыл жөніндегі кеңестің алғашқы отырысы өтті, - деп хабарлайды Polisia.kz.
Қызылорда облысы полиция департаментінде есірткіге қарсы іс-қимыл жөніндегі кеңестің алғашқы отырысы өтті. Жиынға департамент бастығы Серік Ергешов төрағалық етті.
Кеңестің басты мақсаты – нашақорлық пен есірткі қылмысының алдын алу, жастарды салауатты өмір салтын ұстануға шақыру, бұл бағыттағы іс-шараларды бұқаралық ақпарат құралдары арқылы кеңінен насихаттау. Сонымен қатар қоғам белсенділерін, мәдениет қайраткерлерін, спортшылар мен еріктілерді жұмылдыра отырып, есірткіге қарсы іс-қимыл шараларын күшейту көзделген.
Отырыста Қызылорда облыстық мәслихатының депутаты, ішкі істер органдарының құрметті ардагері Әмірбек Шаймағанбетов, "Аманат" партиясы жанындағы "Жастар рухы" жастар қанаты облыстық филиалының төрағасы Асетхан Баймурза, Қалалық жастар ресурстық орталығының директоры Медет Жорабек, "Болашақ" университетінің проректоры Нұрлан Мұханов, "Жастардың спорттық туризм және туристік көпсайыс федерациясы" бірлестігінің төрағасы Бақытбек Досмаилов, "Қызылорда еріктілер" қоғамдық қорының төрайымы Ольга Чебакова, "QYZYLORDA" телеарнасының тілшісі Елдос Асан, облыстық әжелер және қалалық әйелдер кеңестерінің мүшесі Алтынкүл Балмағанбетова, облыстық психикалық денсаулық орталығы директорының орынбасары Аман Тұрсынов және "QOSYL" командасының мүшелері қатысты.
Алқалы жиында Серік Ергешов жастар арасында нашақорлықтың таралу қаупіне назар аударып, бұл бағыттағы жұмыстарды жүйелі жүргізудің маңыздылығын атап өтті.
– Өткен жылы Мемлекет басшысы Қасым-Жомарт Тоқаев Жолдауында есірткі қылмысына қарсы күрес ұлттық деңгейде жүргізілуі тиіс екенін баса айтты. Ал Ішкі істер министрі 2025 жылды "Профилактика жылы" деп жариялады. Бұл ретте заң мен тәртіпті қамтамасыз ету – біздің басты міндетіміз. Нашақорлыққа қарсы күресті күшейту үшін полиция ғана емес, қоғамдық ұйымдар, спортшылар, танымал тұлғалар мен сарапшылар бірлесіп жұмыс атқаруы керек. Осы мақсатта есірткіге қарсы іс-қимыл жөніндегі кеңес құруды ұсынамыз. Бұл кеңес халықтың есірткіге қарсы мәдениетін қалыптастырып, жастар арасында зиянды әдеттердің алдын алуға бағытталған тиімді шараларды жүзеге асырады, – деді департамент бастығы.
Жиында сондай-ақ полиция департаменті бастығының бірінші орынбасары, полиция полковнигі Серік Тоқтыбаев сөз сөйлеп, жастарды есірткіден қорғау жолдары, нашақорлықтың алдын алу шаралары және есірткі бизнесіне қарсы күрестің тиімді тетіктері туралы баяндама жасады.
Кеңес отырысының қорытындысы бойынша қатысушылар жастарды адамгершілікке тәрбиелеу, салауатты өмір салтын насихаттау және есірткіге қарсы күресті күшейту жөнінде бірқатар бастамаларды көтерді. Кеңес төрағасының орынбасары болып Әмірбек Шаймағанбетов тағайындалды.
Жиын соңында полиция департаментінің басшылығы кеңес мүшелеріне арнайы куәліктер табыстап, алдағы жұмыстарына сәттілік тіледі.
