Қызылорда облысы полиция департаменті жанынан отбасына көмек көрсетудің бірыңғай орталығы ашылып, ел игілігіне пайдалануға берілді, - деп хабарлайды Polisia.kz.
Қазақстан Республикасы Үкіметінің қаулысына сәйкес, еліміздің барлық өңірлерінде отбасылық-тұрмыстық зорлық-зомбылыққа қарсы күрес жүргізетін мамандандырылған бөлімшелер құрылуда. Осы орайда Қызылорда облысы полиция департаментінің бастамасы мен облыс әкімдігінің қолдауы нәтижесінде облыс орталығында жаңа форматтағы орталық ашылып, өз жұмысын ресми түрде бастады.
Ашылу салтанатына Қызылорда облысы әкімінің бірінші орынбасары Данияр Жаналинов, облыстық полиция департаментінің бастығы, Серік Ергешов, сондай-ақ ішкі істер органдарының ардагері, облыстық мәслихат депутаты Әмірбек Шаймағамбетов қатысып, құттықтау сөз сөйледі.
Серік Жүрсінбайұлы өз сөзінде:
– ҚР Ішкі істер министрлігі тапсырмасына сай, аумақтық бөлімшелер жанынан отбасылық-тұрмыстық зорлық-зомбылықтың алдын алу бағытында мамандандырылған бөлімшелер құрылды. Біздің өңірде де осындай бөлім жұмысын бастап отыр. Негізгі мақсат – әйелдер мен балаларға қатысты жасалатын қылмыстардың алдын алу, жәбірленушілердің құқық қорғау органдарына деген сенімін арттыру, және әрбір азаматқа заң аясында қорған болуға әзір екенімізді көрсету. Бұл бөлімшенің басты ерекшелігі – Мемлекет басшысының тапсырмасына сәйкес, мұнда негізінен әйел қызметкерлер жұмыс істейді. Бұл – жәбір көрген әйелдердің өз мәселесін ашық айтып, сенім артуына жол ашады, – деді.
Жаңа орталық – отбасы институтын нығайтуға бағытталған маңызды жоба. Мұнда келушілерге құқықтық, психологиялық, әлеуметтік көмек тегін көрсетіледі. Жәбірленушілер тек тұрмыстық зорлық-зомбылық мәселелері бойынша емес, алимент өндіру, діни алауыздық, әлеуметтік қолдау сынды түрлі мәселелер бойынша да жүгініп, шешім таба алады.
Орталық 10 мамандандырылған кабинетпен жабдықталған. Атап айтқанда тергеу, ювеналды полиция, әйелдерді зорлық-зомбылықтан қорғау, сот орындаушылар, заңгерлер, психолог, теолог, медиатор, волонтер және әлеуметтік қызметкерлер өз саласы бойынша кәсіби көмек көрсетеді.
Бұл орталық – тек құқықтық қолдау емес, сонымен қатар мейірім мен сенімнің мекені болмақ. Халықтың полицияға деген сенімін арттырып, отбасылық құндылықтарды қорғауға бағытталған бұл бастама қоғам тыныштығы мен бірлігін нығайтуға үлкен үлес қосары сөзсіз.
