Қызылорда облысында ауыл тұрғынынан телефон ұрлап, несие рәсімдеген наубайхана қызметшісі ұсталды, – деп хабарлайды Polisia.kz.
Қызылорда облысы Полиция департаменті Қармақшы ауданының полиция бөліміне ауыл тұрғыны жүгініп, наубайханың демалыс бөлмесінде тұрған ұялы телефонын белгісіз біреу ұрлап кетіп, банк қосымшасы арқылы құны 480 мың теңгеден аса несие рәсімдеп алғанын көрсеткен.
Жедел-іздестіру шараларының нәтижесінде полицейлер осы қылмысқа қатысы бар күдіктіні анықтап, ұстады. Ол сол наубайханада екі ай меңгеруші болып жұмыс істеген әйел болып шықты. Оған қатысты «ешқайда кетпеу және өзін дұрыс ұстау туралы қолхат» түріндегі бұлтартпау шарасы қолданылды.
Аталған дерек бойынша Қазақстан Республикасы Қылмыстық кодексінің 188-бабының 2-бөлігімен (Ұрлық) сотқа дейінгі тергеп-тексеру амалдары жүргізілуде.
