Қызылорда облысында жол қозғалысы ережелеріне енгізілген жаңа талаптар түсіндірілді, - деп хабарлайды Polisia.kz.
Қазақстанда жол қозғалысы қауіпсіздігін қамтамасыз ету және жол-көлік оқиғаларының санын азайту мақсатында жаңа талаптар енгізіліп, тиісті заңнама бекітілді. Жол қозғалысы ережелеріне қосылған маңызды жаңалықтардың бірі – «орташа жылдамдық» ұғымы. Бұл көрсеткіш белгілі бір аралықтағы көлік құралының жүріп өткен уақытын және қашықтығын есептеу арқылы анықталады.
Өңірлік коммуникациялар қызметінде өткен баспасөз мәслихатында Қызылорда облыстық полиция департаменті әкімшілік полиция басқармасы бастығының орынбасары Нүркен Бақтияров жаңа өзгерістерді түсіндірді.
– 2023 жылдың қазан айында Мемлекет басшысы жол қозғалысы қауіпсіздігін арттыруға және жол-көлік оқиғаларын азайтуға бағытталған жаңа заңға қол қойды. Бұл заң 4 желтоқсаннан бастап күшіне енді. Оның басты мақсаты – түзу жол учаскелерінде «орташа жылдамдықтан» асып кеткен көлік жүргізушілерін автоматты тіркеу және жауапкершілікке тарту, - деді ол.
«Орташа жылдамдық» ұғымы жүріп өткен жолды сол жолды жүріп өткен уақытқа бөлу арқылы есептеледі. Бұл әдіс арқылы жылдамдықты асырған көлік жүргізушілеріне 5-тен 40 айлық есептік көрсеткішке дейін айыппұл салынады. Қызылорда облысының аумағындағы халықаралық М32 «Шымкент-Самара» автожолында орнатылған «ZEREK-2» кешендері жылдамдық режимін бақылауға жауапты. Қазіргі таңда үш кешен жылдамдықты асыру деректерін автоматты түрде тіркеуде.
Сонымен қатар 1 желтоқсаннан бастап заңды тұлғалар үшін көлік құралдарын елге әкелу тәртібі жаңартылды. Қызылорда облысы Мемлекеттік кірістер департаменті басшысының орынбасары Қуанышбек Бекшин бұл өзгерістердің маңыздылығын атап өтті.
– Енді заңды тұлғалар көлік құралдарын ел аумағына әкелу үшін олардың техникалық регламенттерге сәйкестігін растайтын арнайы құжат – көлік құралдарының типін мақұлдау туралы куәлік алуы қажет. Бұл құжат тек сериялық өндіріс үшін беріледі және Еуразиялық экономикалық одақтың техникалық талаптарына толық сәйкес келеді. Негізгі мақсат – Қазақстанға тек техникалық қауіпсіздігі расталған көлік құралдарын әкеліп, олардың сапасын бақылау, - деп атап өтті Қуанышбек Бекшин.
Жаңа ережелер жол қозғалысы қауіпсіздігін күшейтіп, жол-көлік оқиғаларын азайтуға және ел аумағына жеткізілетін көлік құралдарының сапасын жақсартуға бағытталған.
