Қызылорда облысының полиция департаментінде жаңа кітаптардың тұсаукесері өтті, — деп хабарлайды Polisia.kz.
Елдігімізге тұғыр болған Конституцияның қабылданған күніне орай Қызылорда облысының полиция департаментінде ішкі істер органдарының құрметті ардагері, Қазақстан Журналистер Одағының мүшесі Қоразбаев Хұсайын Асанұлының “Офицер жазбалары” атты кітабының тұсаукесер рәсімі өтті. Мәдени шараға полиция департаментінің басшылығы, ардагерлері мен жеке құрамы қатысты.
Сонымен қатар бірнеше күн бұрын Жалағаш кентіндегі Руханият орталығында ішкі істер органдарының құрметті ардагері, Қазақстан Журналистер Одағының мүшесі Нұржанов Болатбек Нұржанұлының “Жалағаштық майдангер сақшылар” атты кітабының тұсаукесері өткен болатын.
Қазақстан Журналистер Одағының мүшесі, өлкетанушы қаламгер Нұржанов Болатбектің бұл еңбегі Ұлы Отан соғысындағы жеңістің 80 жылдығына арналған тарихи –деректі, естелік сипатындағы зерттеу. Кітапта Жалағаш ауданынан майданға аттанған НКВД қызметкерлері мен милиция қатарындағы жауынгерлердің ерлігіне, тылдағы қажырлы қызметіне және соғыстан кейін құқық қорғау органдарында атқарған адал еңбектеріне кеңінен тоқталған.
Хұсайын Асанұлының “Офицер жазбалары” кітабына ұзақ жылдар құқық қорғау саласындағы қызмет кезіндегі орын алған атышулы қылмыстар мен тергелген қылмыстық істер, жаңадан қабылданған заңдар, тарихи зерттеулер мен портреттік очерктер енгізілген. Кітаптағы әр мақала өмірдегі өзекті мәселені көтере алуымен, сол арқылы оқырманға ой салуымен құнды.
Бұл жинақ студенттерге, заңгерлерге, құқық қорғау саласы қызметкерлеріне, зерттеушілерге, ұстаздарға, сондай – ақ халқымыздың ұлы перзенттері туралы тереңірек білгісі келетін барлық оқырманға арналады.
Бүгінгі шара барысында кітаптардың бүгінгі қоғаммен үндестігі, безендірілуі, көркемдік шеберлігі туралы әңгіме қозғалды. Қатысушылар ардагерлердің еңбегіне жоғары баға берді. Алдағы уақытта жаңа кітаптар облысымыздың кітапханаларына таратылатын болады.
