Биылғы жылдың жеті айында Қызылорда облысы Полиция департаментінің жедел басқару орталығының «102» арнасына 24 мыңнан астам қоңырау келіп түсті және полиция құзыретіне жататын 23 мың хабарламаға қызмет көрсетілді, – деп хабарлайды Polisia.kz.
Жыл басынан бері бейнебақылау камерасының көмегімен 67 қылмыс ашылды.
Бейнебақылаушылар азаматтардан келіп түскен хабарламаларды қабылдау және өңдеу барысында барлық күдікті әрекеттерді, адамдардың мінез-құлқын және бейнебақылау камерасына түскен күмәнді адамдарды жедел тексереді.
Мысалы, 2020 жылдың 17 ақпанында Қызылорда қалалық ПБ жедел басқару орталығының бейнебақылау инспекторы сағат 03:30-да кафенің жанында белгісіз біреу қызды ұрып-соғып, оқиға орнынан қашып кеткенін байқаған. Санаулы секундта Желтоқсан көшесіндегі камераларды шолу барысында, кафелердің біріне қарама-қарсы үш адам бір-бірімен төбелесіп жатқанын байқап, дереу кезекші инспектор патрульдік полиция нарядын оқиға орнына жіберіп, күдікті ұсталды. Кейін қызды ұрып-соққан бұзақының Қазалы ауданының 26 жастағы тұрғыны екені анықталды.
8 тамызда «Құқықтық тәртібі» жедел профилактикалық іс-шарасы барысында бейнекамера бойынша бақылау инспекторы түнгі сағат 3-те облыс орталығында күдікті жас жігітті байқайды. Тексеру үшін полиция наряды жіберілді. Келген патрульдік полицейлерді көріп, ешқандай түсіндірмесіз қаша жөнелген.Ол ұсталғаннан кейін оның сөмкесінде травматикалық тапанша болғандығы анықталды. Оқиғаның мән-жайы анықталуда.
Айта кетейік, жыл басынан бері бейнебақылау камераларының көмегімен 10 мыңға жуық әкімшілік құқық бұзушылық, оның ішінде сегіз мыңнан астам жол қозғалысы ережелерін бұзу анықталған.
