Қызылордалық полицейлер ашық есік күнін өткізді, – деп хабарлайды Polisia.kz.
Жастар арасында құқық бұзушылықтың алдын алу және білім алушыларды полиция қызметімен таныстыру мақсатында Қызылорда облысы полиция департаментінің жедел-криминалистикалық басқармасында Қызылорда ашық университетінің заңгер мамандығы бойынша оқып жатқан студенттер үшін танымдық экскурсия ұйымдастырылды.
Іс-шара барысында студенттерге криминалист мамандар күнделікті қолданатын заманауи техникалық құрал-жабдықтар мен зертханалар таныстырылып, оқиға орнын тексеру бойынша дәрістер өткізілді. Жастар криминалистика саласының қыр-сырымен танысып, бұл мамандыққа деген қызығушылықтарын білдірді.
Экскурсия соңында студенттер мен оқытушылар полиция қызметкерлеріне алғыстарын айтып, көрсетілген құрмет пен қолдау үшін ризашылықтарын жеткізді.
