Қызылордада пробация есебіндегілер асық ату жарысына қатысты, - деп хабарлайды Polisia.kz.
Қазақстан Республикасы Конституциясының 30 жылдығына орай Жаңақорған ауданында пробация есебіндегі азаматтарға арналған спорттық шара ұйымдастырылды. Іс-шараны аудандық дене тәрбиесі, спорт және туризм бөлімі мен пробация қызметі бірлесіп өткізді. Жарыс қазақтың ұлттық ойыны – асық ату бойынша өтті.
Шараның басты мақсаты – ұлттық дәстүрді дәріптеу, сотталғандарды қоғамға бейімдеу, бос уақытын тиімді өткізуге жағдай жасау және салауатты өмір салтын қалыптастыру.
Жарыс тартысты әрі қызықты өтті. Қатысушылар мергендіктерін танытып, асық атудағы шеберліктерін көрсетті. Қорытындысында үздік ойыншылар алғыс хаттармен және медальдармен марапатталды.
Жарысқа қатысушылардың бірі алған әсерімен бөлісті:
– Асық ойыны арқылы өзімізді басқа қырдан көрсетіп, ұлттық дәстүрімізді жаңғырттық. Осындай шаралар бізге қолдау көрсетіп, дұрыс жол таңдауға жігер береді. Алдағы уақытта қателікке жол бермей, отбасым мен қоғамға пайдасы тиетін азамат болғым келеді, – деді ол.
Ұлттық ойындарды насихаттауға бағытталған мұндай бастамалар пробация есебіндегі азаматтардың бос уақытын мазмұнды өткізуге мүмкіндік беріп қана қоймай, олардың қоғамға қайта бейімделуіне де оң ықпалын тигізуде.
