Қызылордада Конституция күніне орай қызмет бабында ерекше көзге тсүкен сақшылар марапатталды, - деп хабарлайды Polisia.kz.
Ел Тәуелсіздігінің кепілі, келешектің кемелі - Конституция күні. Әрбір азаматтың құқықтарының сақталуына кепіл. Конституция талаптары елдегі заң салаларының негізі, ал оның нормалары басқа заңдар үшін қағида болып есептеледі. Еліміздің заң нормаларының орындалуын қамтамасыз ету жолында еңбек етіп, ел тыныштығы мен тұрақтылығына өзіндік үлестерін қосып жүрген полицейлер Ата Заңымызды ұлықтауда.
Осы орайда бүгін Қызылорда облысы полиция департаментінде Конституция күніне арналған салтанатты шара өтті. Шараға ішкі істер органдарының ардагерлері, департамент басшылығы мен жеке құрамы қатысты. Сонымен қатар салтанатты шараға қызмет бабында қайтыс болған қызметкерлердің ата–аналары мен туыстары шақырылды.
Салтанатты шара еліміздің көк байрағына құрмет көрсетілуден басталды. Сонан соң Қазақстан Республикасы Ішкі істер министрі Ержан Саденовтің мерекелік жедел хаты оқылды. Ішкі істер министрінің бұйрығымен қызмет бабында ерекшеленген 15 қызметкер марапатталды.
Марапатталғандардың қатарында еңбегі еленген учаскелік полиция инспекторы Адай Қайрат та бар. Қоғамдық тәртіпті сақтауда әрдайым алдыңғы шепте тұратын учаскелік полиция инспекторларының қызметі қашанда өзекті. Таңмен жарыса тұрып, халық игілігіне қызмет атқаратын тәртіп сақшысының еңбегі еленіп, кәсіби біліктілігі мен жауапкершілігі жоғары бағаланды.
Мерекелік іс-шара барысында полиция департаментінің бастығы Серік Ергешов қоғамдық тәртіпті сақтауға ерекше үлес қосқан полицейлер мен ардагерлерге марапаттарын табыстады. Қызылорда облысы ПД бастығының бұйрығымен қызметтік міндеттерін адал атқарған, құқықтық тәртіп пен қауіпсіздікті қамтамасыз етуде ерекше көзге түскен департаменттің 205 қызметкері және 28 ардагер марапатталды.
Осы сәтте департамент бастығы Серік Жүрсінбайұлы қызмет бабында ерлікпен қаза тапқан полиция лейтенанты Талғат Қозыбаевты тәрбиелеген Есентай ағаға және ішкі істер органдарында қажырлы еңбек етіп, зейнеткерлікке шыққан сала ардагері Асылхан Абдраманов құрмет көрсетіп, оларға шипажайға жолдама сыйлады. Айтулы күнмен Ардагерлер кеңесінің төрағасы Әмірбек Шаймағамбетов қызметкерлерді құттықтап, азаматтық борыштарын абыроймен атқаруларына тілектестік білдіріп, ыстық ықыласын жеткізді.
Мерекелік іс-шара концерттік бағдарламаға ұласты. Халықтың тыныштығы мен қауіпсіздігін қорғап, қоғамдық тәртіпті қамтамасыз ету бағытында абыройлы қызмет етіп жүрген полиция қызметкерлеріне арнап жергілікті өнерпаздар өнер көрсетті.
