Қызылордада сотталғандарға құқықтары мен міндеттері түсіндірілді, - деп хабарлайды Polisia.kz.
Қызылорда облысы бойынша Қылмыстық-атқару жүйесі департаментінің №37 мекемесінде 150-ден астам сотталған жазасын өтеп жатыр. Бұл мекемеде сотталғандардың құқықтық сауаттылығын арттыру мақсатында жүйелі түрде түсіндірме жұмыстары жүргізіледі.
Бүгін мекеме заңгері Жалғас Есмаханов сотталғандарға Қазақстан Республикасының Қылмыстық-атқару кодексінің 118-бабына түсініктеме берді. Аталған бапта жазасын өтеу барысында мемлекетке, мекемеге немесе жеке және заңды тұлғаларға материалдық залал келтірген жағдайда сотталғандардың материалдық жауапкершілікке тартылатыны айтылған. Сондай-ақ сотталғандар мемлекетке немесе мекемеге келтірілген шығынды, қашып шығу әрекеттерінен туындаған залалдарды және өз денсаулығына қасақана зиян келтіріп, емделуге жұмсалған қосымша шығындарды өтеуге міндетті.
Заңгер сотталғандардың құқықтары мен міндеттерін егжей-тегжейлі түсіндіріп, әрбір азамат жасаған әрекеттерінің салдарын білуі және жауапкершілігін сезінуі қажеттігін ерекше атап өтті.
Іс-шара соңында жазасын өтеушілер өздерін қызықтырған сұрақтарын қойып, заңгерден толыққанды жауаптарын алды. Мұндай кездесулер сотталғандардың құқықтық мәдениетін арттырып, олардың қоғамға қайта бейімделуіне ықпал етеді.
