Қызылордада жол қозғалысы ережелерін бұзған 172 жүргізушіге әкімшілік шара қолданылды, - деп хабарлайды Polisia.kz.
Қызылорда қаласында Полиция басқармасы жол қозғалысы мәдениетін арттыру, көлік оқиғаларының алдын алу және тәртіп бұзушылықтарды азайту мақсатында тұрақты түрде рейдтік іс-шаралар ұйымдастырып келеді.
Жыл басынан бері қала аумағында жедел басқару орталығының бейнекамералары мен патрульдік полиция батальоны қызметкерлерінің үйлесімді жұмысының нәтижесінде 172 жүргізушінің қарама-қарсы бағытқа шығып, жол ережесін бұзғаны анықталды.
Аталған заң бұзушылықтар бойынша жүргізушілерге Қазақстан Республикасы Әкімшілік құқық бұзушылықтар туралы кодексінің 596-бабының 3-бөлігіне сәйкес (Жол жүрісі қағидалары тыйым салған жағдайларда жолдың қарсы бағытқа шығып, бұрылу немесе кері бұрылу) әкімшілік хаттамалар толтырылды.
Сонымен қатар тәртіп сақшылары қарама-қарсы бағытқа шығу секілді ережелерді бұзған жүргізушілердің көлік құралын басқару құқығынан 6 айға айырылатынын және әкімшілік жауапкершілікке тартылатынын ескертеді.
Жол қозғалысы ережелерін сақтау – баршамыздың өміріміз бен қауіпсіздігіміздің кепілі. Әрбір жүргізуші тәртіпке бағынса, жол-көлік оқиғаларының саны азаяды, ал жолдарымыз қауіпсіз бола түседі.
