Өңірлік коммуникациялар қызметінде Қызылорда облысы полиция департаментінің жергілікті полиция қызметі басқармасының бастығы Ердәулет Жаукеев бұқаралық ақпарат құралдарының өкілдеріне брифинг өткізді, – деп хабарлайды Polisia.kz.
Жиында облыс аумағында жүргізілген "Көктемгі демалыс" жедел-профилактикалық іс-шарасының нәтижелері баяндалды.
Бұл шараның басты мақсаты – қоғамдық тәртіпті қамтамасыз ету, көшелер мен басқа да қоғамдық орындарда кәмелетке толмағандар арасындағы және оларға қарсы жасалатын қылмыстардың алдын алу. Атап айтқанда, бұзақылық, суық қару тасымалдау, бопсалау секілді құқық бұзушылықтардың жолын кесу, сондай-ақ кәмелетке толмағандардың түнгі уақытта заңды өкілдерінсіз үй-жайдан тыс болу фактілерін анықтау. Сонымен қатар құқық бұзушылыққа бейім жасөспірімдерді және бала тәрбиесіне немқұрайлы қарайтын ата-аналарды анықтап, ішкі істер органдарының есебіне алу көзделді.
Іс-шара аясында қалалық полиция басқармасы мен аудандық полиция бөлімдерінің қызметкерлері жастар ресурстық орталығының өкілдері және педагогтармен бірлесіп, рейдтік жұмыстар жүргізді. Негізгі мақсат – қараусыз және панасыз қалған балаларды анықтау, сондай-ақ кәмелетке толмағандардың түнгі уақытта ойын-сауық орындарында немесе тұрғын үйден тыс жерде жүруін болдырмау.
Іс-шараның қорытындысымен барлығы 296 түрлі әкімшілік құқық бұзушылық бойынша хаттама толтырылды. 11 жасөспірім ішкі істер органдарының есебіне алынды. 5 бала қараусыз және панасыз қалғаны үшін арнайы орынға жеткізілді. 1 жасөспірім тыйым салынған заттарды заңсыз алып жүргені үшін ұсталды. Балаларын тәрбиелеу жөніндегі міндеттерін орындамаған 23 ата-анаға хаттама рәсімделді. Кәмелетке толмағандарға қатысты жәбірлеу фактісі бойынша 3 құқық бұзушылық анықталды. ҚР ӘҚБтК-нің 132-бабы (ойын-сауық мекемесіне заңды өкілісіз кіргізу) бойынша 10 дерек тіркелді. 423-1-бабы (21 жасқа толмағандарға темекі өнімдерін сату) бойынша 2 әкімшілік хаттама толтырылды.
Сондай-ақ қоғамдық орындарды ластау бойынша 16 құқық бұзушылық анықталды. Түнгі уақытта заңды өкілінсіз ойын-сауық мекемелерінде жүрген 235 жасөспірім анықталып, олардың ата-аналарына әкімшілік хаттама рәсімделді. Жасөспірімдерді тәрбиелеу, оқыту және (немесе) бағып-күту міндеттерін орындамаған 13 ата-ана профилактикалық есепке алынды.
Кәмелетке толмағандармен және оларға қарсы жасалатын құқық бұзушылықтардың алдын алу шаралары жалғасуда.
