Қызылордалық полицейлер жас футболшыларды марапаттады, – деп хабарлайды Polisia.kz.
“Динамо» денешынықтыру спорттық қоғамы Қызылорда облыстық филиалы мен Қызылорда облысы полиция департаментінің жергілікті полиция қызметі басқармасының ұйымдастыруымен 2011-2013 жылғы жасөспірімдер арасында шағын футболдан жарыс өткізілді. Аталмыш іс-шараның мақсаты – жасөспірімдер арасында құқық бұзушылық пен қылмыстылықтың алдын алу.
Жергілікті полиция қызметі басқармасының бастығы Даурен Майрихов және «Динамо» ДШСҚ ҚОФ төрағасының орынбасары Қуандық Миралиев жас қатысушыларға өздерінің ізгі тілектерін айтып, ойындарына сәттілік тіледі.
Шағын футбол жарысының ережесіне сәйкес шараға облыс орталығының жеті орта оқу орнының жасөспірімдерінен құралған командалар қатысты.
Жарыстың қорытындысы бойынша 1-орынға «Номад», 2-орынға № 278 мектеп және 3-орынға «Сармақ» топтарының жас футболшылары ие болды.
Олар «Динамо» ДШСҚ кубоктарымен және полиция департаментінің грамоталарымен марапатталды. Сонымен қатар, «Үздік шабуылшы», «Үздік қорғаушы» және «Үздік қақпашы» номинациялары бойынша жас футболшылар жеңіс тұғырынан көрінді.
