Ұлытау облысында көкөніс салынған қапқа 34 телефонды жасырып, түзеу мекемесіне алып өтпек болғандар анықталды, – деп хабарлайды Polisia.kz.
Күдіктілер 34 телефонды сотталғандарға арналған тамаққа жасырып, Ұлытау облысында орналасқан №62 мекемеге өткізбек болған. Аталған мекеменің қызметкерлері сотталғандардың пайдалануына тыйым салынған заттарды өткізудің жолын кесті.
Азық-түлік өнімдерін тиеу кезінде Газель көлігі тексерілді. Сәбіз салынған қаптардың бірінде төрт қара түсті пластик “сәлемдеме” жасырылған. Ашылған кезде 34 телефон, 11 құлаққап, 3 флэш-карта және 30 SIM-карта анықталды.
Осы факті бойынша Жезқазған қалалық полиция бөлімінің тергеу-жедел тобы шақырылды.
– Қазіргі уақытта тыйым салынған заттарды жеткізбек болған күдіктінің мекенжайын анықтау мақсатында жедел-іздестіру шаралары жүргізіліп жатыр, – деді Қарағанды және Ұлытау облыстары бойынша ҚАЖД баспасөз қызметі.
