Семейде есірткі жарнамасына қарсы рейд өтті, – деп хабарлайды Polisia.kz.
Абай облысы полиция департаменті есірткі қылмысына қарсы іс-қимыл басқармасының қызметкерлері Семей қаласында есірткі дүкендеріне сілтемелері бар граффити жазуларды бояп өшіру бойынша рейд жүргізді.
Іс-шараға "СОЦKZ" қоғамдық қорының еріктілері қосылды. Сондай-ақ алғаш рет ерікті ретінде жуырда бас бостандығынан айырылу орындарынан босап шыққан азамат қатысты.
Ол қаланың игілігі үшін пайдалы іске өз еркімен қатысуға ниет білдірді. Бұл — қалыпты өмірге қайта оралу нақты әрекеттерден басталатынының айқын мысалы.
Рейд барысында есірткі дүкендеріне сілтемелері бар 15-тен астам жазу өшірілді. Атап айтқанда, Бозтаев – Колхозная көшелері бойында, сондай-ақ Рысқұлов көшесінде орналасқан есірткі жазбалары жойылды.
– Мұндай жазулар — жай ғана суреттер емес, адамдарды тартуға бағытталған құрал және тыйым салынғанды үйреншікті етіп көрсету әрекеті. Сондықтан әрекет жедел болуы тиіс, ал қала есірткі жарнамасынан таза болуы қажет, – деп атап өтті полиция қызметкерлері.
Егер осындай жазуларды байқасаңыз, 102 нөміріне хабарласыңыз. Ақпарат неғұрлым ерте түссе, заңсыз жарнама соғұрлым тез жойылып, тиісті шаралар қабылданады.
