Семейде нашақорлыққа қарсы күрес айлығы аясында жасөспірімдер арасында қалалық футбол турнирі өтті, — деп хабарлайды Polisia.kz.
Семей қаласында Халықаралық нашақорлыққа қарсы күрес күніне орай жасөспірімдер арасында қалалық футбол турнирі өтті. Іс-шара зиянды әдеттердің алдын алу және өскелең ұрпақ арасында салауатты өмір салтын насихаттау мақсатында жарияланған айлық шеңберінде ұйымдастырылды.
Турнирге қаланың түрлі білім беру мекемелерінен жасақталған жасөспірімдер командалары қатысты. Жас спортшылар өздерінің жоғары физикалық дайындықтарын, командалық рух пен жеңіске деген жігерлерін, сондай-ақ қарсыласқа деген құрметтерін көрсете білді. Бұл — спорт арқылы қалыптасатын маңызды қасиеттердің бірі.
Абай облысы полиция департаментінің қызметкерлері жергілікті білім беру органдарының өкілдерімен бірлесіп, іс-шараның басты мақсаты — жастар арасында есірткіге деген тұрақты теріс көзқарас қалыптастыру және белсенді әрі салауатты өмір салтын дәріптеу екенін атап өтті.
Жарыс қорытындысы бойынша жеңімпаздар мен жүлдегерлер грамоталармен және кубоктармен марапатталды. Ерекше көзге түскен ойыншыларға арнайы жекелеген сыйлықтар табысталды.
Мұндай спорттық бастамалар жасөспірімдермен жүргізілетін профилактикалық жұмыстың маңызды бөлігі болып табылады және жастардың бойында оң көзқарасты, дұрыс өмірлік ұстанымдарды қалыптастыруға ықпал етеді.
