Шахтинскіде сотталған әйелдер Ұлттық кітап күніне арналған шараға қатысты, - деп хабарлайды Polisia.kz.
23 сәуірде елімізде алғаш рет маңызды мәдени мереке — Ұлттық кітап күні ресми түрде аталып өтті. Бұл күн әлемдік деңгейде де ерекше мәнге ие. Дәл осы күні ЮНЕСКО шешімімен Дүниежүзілік кітап және авторлық құқық күні белгіленген.
Атаулы күнге орай Қарағанды облысына қарасты Шахтинск қаласындағы облыстық кітапханада дәстүрлі кітап көрмесі ұйымдастырылды. Іс-шараға қылмыстық жазасын өтеп жатқан сотталған әйелдер де қатысып, өздерінің эмоционалды интеллектін дамыту мақсатында кітапханамен танысты.
Кездесу барысында жазасын өтеушілердің бірі кітап оқу арқылы адамның ішкі дүниесі мен қоршаған ортаны тануға мүмкіндік алатынын атап өтті. Оның айтуынша, қандай да бір кітапты қайта-қайта оқу – білімнің тереңдеуіне жол ашады, ал сол білімді нақты өмірде тиімді қолдана білу — шынайы құндылық.
— Зияткерлік база – баға жетпес құрал. Бірақ оны қажет сәтте пайдалана білу — одан да маңызды. Үнемі кітап оқу өз ойыңды анық әрі дәл жеткізуге көмектеседі. Сонымен қатар, кітаптар арқылы адам жаңа ортаға бейімделіп, жақсы сұхбаттасушы бола алады. Оқудың арқасында сөйлеу тілі байып, дүниетаным кеңейеді, әлемге деген өзіндік көзқарас қалыптасады, — деді жазасын өтеуші.
Мереке аясында өткізілген бұл шараның басты мақсаты – кітаптың адам өміріндегі маңызын арттыру, рухани жаңғыру мен өзін-өзі дамытуға жол ашу. Кітап оқу — сана-сезімді тәрбиелеп, тұлғаны биікке жетелейтін рухани кеңістік.
