Шығыс Қазақстан облысында "Есірткіге – жоқ деп айт!" ұранымен жасөспірімдер арасында облыстық бокс турнирі өтті, - деп хабарлайды Polisia.kz.
Турнирді ШҚО ПД Есірткі қылмысына қарсы іс-қимыл басқармасы өңірлік бокс жаттықтырушыларымен бірлесіп ұйымдастырды.
Шараның мақсаты – тек дарынды спортшыларды анықтау ғана емес, сондай-ақ жастар арасында нашақорлықтың алдын алу, салауатты өмір салтын насихаттау және спортқа деген қызығушылықты арттыру.
Жарысқа 30-70 келі салмақ дәрежесіндегі 80-нен астам жас боксшылар қатысты. Олар Өскемен, Риддер, Аягөз ауданы командалары мен "Абылай", "Алимхан", "Арт Спорт", "Интеллект Бокс" спорт клубтарының атынан өнер көрсетті.
Жас спортшылар өздерінің күшін, төзімділігін және қазақ батырларына тән нағыз жауынгерлік рухты көрсетті. Әр жекпе-жек тартысты әрі қызықты өтіп, бәсекелестік рухы қарсыластарға деген құрметпен ұштаса түсті.
Турнир аяқталған соң барлық қатысушылар мен олардың жаттықтырушылары ШҚО ПД Есірткі қылмысына қарсы іс-қимыл басқармасының атынан грамоталармен, медальдармен және бағалы сыйлықтармен марапатталды. Жас спортшыларға турнирдің басты идеясы - спортты таңдау және салауатты болашақ үшін күрес екенін еске салатын арнайы футболкалар мен бейсболкалар сыйға тартылды.
