Шығыс Қазақстан облысында нашақорлықпен күрес жөніндегі штабтың кеңейтілген отырысы өтті, - деп хабарлайды Polisia.kz.
10 сәуір күні Өскемен қаласында нашақорлық пен есірткі бизнесіне қарсы күрес жөніндегі өңірлік ведомствоаралық штабтың кеңейтілген отырысы өтті. Отырысқа облыс әкімінің орынбасары Бақытжан Баяхметов пен ШҚО полиция департаменті бастығының бірінші орынбасары Алмаз Төкенов төрағалық етті.
Кездесуге прокуратура, Ұлттық қауіпсіздік комитетінің департаменті (ҰҚКД), экономикалық тергеу департаменті (ЭТД), Қылмыстық-атқару жүйесі департаменті (ҚАЖД), шекара қызметі, фармацевтикалық бақылау, денсаулық сақтау, мәдениет және спорт департаменттері, сондай-ақ қала және аудан әкімдері, полицияның аумақтық бөлімшелерінің басшылары мен үкіметтік емес ұйымдардың өкілдері қатысты.
Отырыста ШҚО полиция департаменті есірткі қылмысына қарсы іс-қимыл басқармасының бастығы Дәулет Жұмаділов баяндама жасап, өңірде есірткінің заңсыз айналымына қарсы жүргізілген жұмыстарды атап өтті.
- Жыл басынан бері облысымызда есірткі қылмыстарына қатысты 85 дерек тіркелді. Олардың ішінде 34 сату фактісі, 10 есірткі құрамдас өсімдіктерді өсіру және аса ірі көлемде сақтау бойынша 2 оқиға анықталды. Жалпы 38 кг есірткі тәркіленді, оның ішінде 36 кг марихуана, 1,3 кг синтетикалық есірткі және 63 грамм гашиш бар, — деді Д. Жұмаділов.
Оның айтуынша, өңірде ақпараттық-түсіндіру жұмыстары белсенді түрде жүргізілуде. Жыл басынан бері 105 іс-шара ұйымдастырылып, 28 мыңға жуық адам қамтылды. Бұл шаралар лекциялар, акциялар, дөңгелек үстелдер мен кездесулер түрінде өткізілді.
- Біздің мақсатымыз тек қылмыстарды анықтаумен шектелмейді. Біз алдын алу шараларына, әсіресе жастар арасындағы профилактикаға ерекше назар аударудамыз. Барлық мүдделі құрылымдармен бірлесіп жұмыс істейміз. Басты мақсатымыз – есірткі тұтыну деңгейін төмендету, таралу арналарына тосқауыл қою және қоғамда есірткіге қарсы сананы қалыптастыру, — деп атап өтті ол.
Отырыс барысында 2023–2025 жылдарға арналған нашақорлықпен күрес жөніндегі кешенді жоспардың жүзеге асырылуы мәселелері талқыланды. Мемлекеттік органдар арасындағы үйлестіруді күшейту және жаңа, заманауи тәсілдер әзірлеу қажеттілігі сөз болды.
Алмаз Төкенов өз сөзінде Ішкі істер министрінің 2025 жылды "Профилактика жылы" деп жариялағанын атап өтіп: "Полиция жүйелі және дәйекті түрде әрекет етеді. Басты бағыттардың бірі – қылмыстың алдын алу, қауіпсіз және "таза" орта қалыптастыру. Барлық жұмыс "Заң мен тәртіп" қағидаты аясында жүргізіледі, — деді ол.
Сонымен қатар ол әр аудан деңгейінде нашақорлықтың алдын алу кеңестерін құруды ұсынып, өзара іс-қимыл тиімділігін арттыру қажеттігін ерекше атап өтті.
Есірткі қылмысымен күрес және дені сау әлеуметтік орта қалыптастыру полиция қызметінің басым бағыттарының бірі болып қала береді. Отырыс қорытындысы бойынша нақты тапсырмалар беріліп, алдағы қадамдар айқындалды.
