ШҚО-да полицейлер отбасында дүниеге келген қос егіз жұп бірінші сыныпқа барады, - деп хабарлайды Polisia.kz.
Полиция сержанты Балауса Зарлыққанованың отбасында зор мереке. Егіз ұлдары Еділ мен Жайық мектеп табалдырығын алғаш аттағалы отыр.
Сырттай қарағанда ұлдар өте ұқсас, бірақ табиғаты әртүрлі және ерік-жігерімен ерекшеленеді. Екеуі де болашақта кім болатынын шешіп қойған: Еділ өрт сөндірушісі, ал Жайық— әскери адам болғысы келеді.
- Мен 44 мектептің 1-сыныбына барамын. Күн сайын дайындаламын, кешке кітап оқимын, - дейді Еділ.
Шығысқазақстандық тағы бір полицейдің Сара мен Зере атты егіз қызы да алғаш рет мектеп партасына отырады. Олардың анасы полиция майоры Меруерт Акатаева Өскемен қалалық ПБ көші-қон қызметінде жұмыс істейді.
Қыздар әдеттегідей қуаныш пен толқу сезімін сыйлайтын алғашқы қоңырауды ерекше күтуде.
Полиция департаментінің басшылығы егіздердің ата-аналарын олар үшін маңызды оқиғада қолдады. Болашақ оқушылар барлық қажетті оқу құралдарымен жабдықталған жаңа, заманауи және ыңғайлы рюкзактармен марапатталды.
- Менің қыздарым Сара мен Зере биыл бірінші сыныпқа барады. Полиция департаментінің бастығы Ерлан Болатұлына көмек көрсеткені үшін өте ризамын, - деді Меруерт Акатаева.
