ШҚО-да полицейлер қоғамдық орындардағы жаңа талаптарды түсіндіруде, - деп хабарлайды Polisia.kz.
Шығыс Қазақстан облысында полицейлер қоғамдық орындарда бетті бүркемелейтін киім киюге тыйым салатын заң нормаларының күшіне енгенін тұрғындарға түсіндіру жұмыстарын жалғастыруда. Аталған заң 2025 жылғы 12 шілдеден бастап ресми түрде қолданысқа енгізілген.
Профилактикалық шаралар аясында учаскелік инспекторлар Өскемен қаласындағы ірі сауда және ойын-сауық орталықтарында жүздеген тұрғынмен кездесіп, жаңа талаптардың мәнін түсіндірді. Негізгі мақсат – азаматтарды қоғамдық қауіпсіздікті қамтамасыз етуге және адамның жеке басын оңай анықтауға бағытталған заң ережелерімен таныстыру.
Полицейлердің айтуынша, тыйым салынған киімдер қатарына бетті толық жауып тұратын никаб немесе бетперде сияқты жабдықтар кіреді. Ал хиджаб, химар және шейла секілді дәстүрлі бас киімдерге, егер бет ашық болса, шектеу қойылмайды.
Сонымен қатар медициналық көрсеткіштерге байланысты, ауа райының қолайсыздығына, кәсіби міндеттерді орындауға немесе мәдени және спорттық іс-шараларға қатысуға байланысты ерекшеліктерге рұқсат беріледі.
Кездесулер барысында полицейлер тұрғындарға киберқауіпсіздік ережелерін еске салып, интернет-алаяқтықтың кең тараған әдістері туралы ескертті. Сондай-ақ тұрмыстық зорлық-зомбылық жағдайында дер кезінде көмекке жүгіну қажеттігін атап өтті. Құқық қорғау органдары төтенше жағдайда бірден 102 нөміріне хабарласуға кеңес береді.
