ШҚО-да полиция 100-ден астам көлікті қар құрсауынан алып шықты, – деп хабарлайды Polisia.kz.
Шығыс Қазақстан облысында соққан күшті жел мен қарлы боран ауа райының күрт нашарлауына әкелді. Дауыл салдарынан Алтай – Өскемен автожолы және басқа да облыстық маңызы бар барлық трассалар жабылды. 100-ден астам көлік жолда қалып, табиғат апатына тап болды.
Полиция қызметкерлері қандай да бір қайғылы оқиғаларды болдырмау үшін оқиға орнына жедел түрде жетті. Құқық қорғаушылар барлық жүргізушілер мен жолаушыларды эвакуациялап, қауіпсіз аймақтарға жеткізді. Зардап шеккендер жоқ.
Тәртіп сақшылары тұрғындарды “112”қызметінен келетін SMS хабарламаларды мұқият қадағалап отыруды сұрайды. Азаматтарға ауа райы тұрақталғанға дейін жолға шықпауға кеңес беріледі. Жол қауіпсіздігі шараларын сақтау күрделі жағдайда өмірлеріңіз бен денсаулықтарыңызды сақтап қалуға көмектеседі. Полиция жағдайды бақылауда ұстап, кез-келген төтенше жағдайда жедел әрекет етуге дайын.
