Шығыс Қазақстан облысында өткен «Үздік учаскелік инспектор және кәмелетке толмағандар істері жөніндегі инспектор» байқауы ішкі істер қызметкерлерінің кәсіби шеберлігін арттыруға арналған маңызды шара болды, – деп хабарлайды Polisia.kz.
Бұл байқау аясында қатысушылар өзара бірнеше кезең бойынша бақ сынасып, кәсіби дағдыларын көрсетті.
Алғашқы кезеңде қызметкерлер атыс алаңында өз ату шеберліктерін байқатты. Келесі кезеңде олардың дене шынықтыру дайындығы тексерілді. Үшінші кезеңде полиция қызметкерлері өз қызметіне қатысты маңызды заңнамалық актілерді білуден сынға түсті. Байқау соңында әрбір қатысушымен жеке әңгімелесу жүргізілді.
Жарыстың қорытындысы бойынша үздік учаскелік инспектор ретінде Шемонаиха аудандық полиция бөлімінің қызметкері Жанболат Қажымханов танылды. Ал кәмелетке толмағандар істері жөніндегі үздік инспектор атағы Алтай қаласы полиция бөлімінің қызметкері Марина Ақтановаға берілді.
Бұл іс-шара полиция қызметкерлерінің кәсіби дайындығын ғана арттырып қоймай, азаматтардың қауіпсіздігін қамтамасыз ету мен құқықтарын қорғау мәселелерін шешуге де ықпал етеді.
Шығыс Қазақстан облысының полиция департаменті бастығының орынбасары, полиция полковнигі Рифхат Тауфиков бұл жарыстардың қызмет көрсету сапасын арттыруға бағытталған жұмыстардың маңызды құрамдас бөлігі екенін атап өтті. Ол өңірде азаматтардың қауіпсіздігін қамтамасыз ету үшін күн сайын өз міндеттерін адал атқаратын полиция қызметкерлерінің жұмысына мақтаныш сезімін білдіріп, жеңімпаздарға алдағы республикалық сынақтарда сәттілік тіледі.
Байқауда үздік нәтиже көрсеткен мамандар енді облыс намысын қорғап, республикалық деңгейде Шығыс Қазақстан облысының абыройын асқақтатып, тәжірибе алмасуға мүмкіндік алады. Бұл олардың кәсіби шеберлігін көрсету ғана емес, сонымен қатар аудандық деңгейдегі жұмыс сапасын одан әрі арттыруға септігін тигізеді.
