Шемонаиха қаласында «Жас сақшы» полиция сыныбы ашылды, - деп хабарлайды Polisia.kz.
Шемонаиха қаласындағы Ахмет Байтұрсынов атындағы №5 орта мектебінде маңызды оқиға — Даур Ибраевтың құрметіне арналған «Жас сақшы» полиция сыныбының ашылу салтанаты өтті.
25 жылын Ішкі істер органдарында қызмет етуге арнаған Даур Ибраев Өскемен қаласы мен Шемонаиха ауданының ішкі істер бөлімдерінің дамуына айтарлықтай үлес қосқан. Оның есімі Шығыс Қазақстан облысы полиция департаментінің қызметтік борышын атқару кезінде қаза тапқан қызметкерлер тізіміне мәңгілікке енгізілген. Өскемен қаласының полиция басқармасында оның ерлікке толы қызметіне арналған еске алу бұрышы орнатылған.
Қазіргі қоғам тарихи және мәдени байланысын түсінетін, өз құқықтары мен міндеттерін білетін, Отанға адал қызмет етуге ұмтылатын тұлғаларды қажет етеді. Кадет сыныптары жас ұрпақты патриотизм рухында тәрбиелеуге, құқықтық білім мен жоғары адамгершілік қасиеттерді қалыптастыруға үлкен ықпал етеді.
- Бүгін балалар үшін ерекше әрі қуанышты күн — олар кадет сыныбына, мектепке және Отанға адал болуға салтанатты түрде ант қабылдады. Құрметті жас кадеттер, ата-аналар, мектеп ұжымы және аудан әкімшілігі, сіздерді осы атаулы шарамен шын жүректен құттықтаймын! Табысқа жету, үлгілі оқу және көшбасшылық сынды жеке қасиеттер біздің кадеттердің ұранына айналсын. Біз кадет сыныптарындағы ант қабылдау рәсімін дәстүрге айналдыруымыз керек, — деді полиция қызметкері Ерхат Шалқыбаев.
Биыл облыста жеті «Жас сақшы» полиция сыныбы ашылғаны да атап өтуге тұрарлық.
Ант қабылдау — бұл жай сөз сөйлеу емес, өз елінің ұлылығын түсіну, оның жетістіктері мен даңқты өткеніне құрмет көрсету сәті.
